الەمنىڭ 40-تان استام ەلى، ونىڭ ىشىندە اقش، وڭتۇستىك كورەيا جانە جاپونيا الدىن الا ەسكەرتۋسىز جۇرگىزىلەتىن بالليستيكالىق زىمىران سىناقتارىنىڭ بەيبىتشىلىك پەن قاۋىپسىزدىككە توندىرەتىن قاۋپى تۋرالى مالىمدەدى. بۇل تۋرالى DW جازدى، دەپ حابارلايدى «ادىرنا» ءتىلشىسى.
11 تامىز، سەيسەنبى كۇنى جاريالانعان بىرلەسكەن مالىمدەمەدە قۇرلىقارالىق بالليستيكالىق زىمىراندار، سۋاستى قايىقتارىنان ۇشىرىلاتىن بالليستيكالىق زىمىراندار جانە زىمىران-تاسىعىشتاردى سىناقتان وتكىزەتىن مەملەكەتتەرگە مۇنداي ۇشىرىلىمدار تۋرالى كەمىندە 24 ساعات بۇرىن الدىن الا حابارلاۋ جونىندە ۇندەۋ جاسالدى. بۇل تالاپ اسىرەسە يادرولىق قارۋعا يە ەلدەرگە قاتىستى ايتىلعان.
قۇجاتتا «رەتتەلگەن ءارى اشىق حابارلاندىرۋ تەتىكتەرى» ەشبىر مەملەكەتتىڭ اسكەري دامۋىن نەمەسە جەدەل قاجەتتىلىكتەرىن شەكتەمەيتىنى، الايدا قاتە ەسەپتەۋلەر قاۋپىن ازايتىپ، «سەنىمدى نىعايتىپ، قاۋىپسىزدىككە ورتاق ۇستانىمدى كورسەتەتىنى» اتاپ وتىلگەن.
ۇشىرىلىم تۋرالى حابارلامالاردا زىمىراننىڭ جالپى كلاسى، ۇشىرۋ ايماعى جانە جوسپارلانعان باعىتى سەكىلدى مالىمەتتەر بولۋى ءتيىس.
مالىمدەمەدە تىنىق مۇحيتىنداعى «جۋىرداعى زىمىران سىناقتارى» كەزىندە بەلگىلەنگەن ستاندارتتاردىڭ ساقتالماعانى ايتىلعانىمەن، قىتايدىڭ اتى تىكەلەي اتالماعان. شىلدە ايىنىڭ باسىندا بەيجىڭ تىنىق مۇحيتى اكۆاتورياسىندا اتومدىق سۋاستى قايىعىنان جالعان وقتۇمسىق ورناتىلعان «ستراتەگيالىق زىمىراندى» سىناقتان وتكىزگەن ەدى. قىتاي بۇل جونىندە ۇشىرىلىم الدىندا ساناۋلى مەملەكەتتەرگە عانا حابارلاعان.
توكيو مەن سەۋلدىڭ مالىمەتىنشە، 12 تامىزعا قاراعان ءتۇنى سولتۇستىك كورەيا كەمىندە ءبىر بالليستيكالىق زىمىران ۇشىرعان. بۇل – بيىلعى جىلدىڭ باسىنان بەرگى ون ءبىرىنشى ۇشىرىلىم.
وڭتۇستىك كورەيانىڭ «ريونحاپ» اگەنتتىگىنىڭ حابارلاۋىنشا، زىمىران كحدر-دىڭ شىعىس جاعالاۋىنداعى ۆونسان اۋدانىنان ۇشىرىلىپ، شىعىس باعىتقا قاراي بەت العان.
وڭتۇستىك كورەيا قارۋلى كۇشتەرى ىقتيمال جاڭا ۇشىرىلىمدارعا بايلانىستى باقىلاۋ مەن قىراعىلىقتى كۇشەيتكەنىن مالىمدەدى.
جاپونيا قورعانىس مينيسترلىگىنىڭ باعالاۋىنشا، زىمىران شامامەن 90 شاقىرىم بيىكتىككە كوتەرىلىپ، ۇشىرىلعاننان كەيىن 10 مينۋت وتكەن سوڭ قۇلاعان. ول 700 شاقىرىمعا جەتپەيتىن قاشىقتىقتى ەڭسەرگەن.
