جەتىسۋ وبلىسىندا حالىقارالىق جاستار كۇنىنە وراي وبلىس اكىمىنىڭ جىل سايىنعى «كوشباسشى – 2026» جاستار سىيلىعىنىڭ لاۋرەاتتارىن سالتاناتتى ماراپاتتاۋ ءراسىمى ءوتتى. ءىس-شارا تالدىقورعان قالاسىنداعى قاراتال وزەنىنىڭ جاعالاۋىندا ۇيىمداستىرىلدى. بيىلعى جىلدىڭ باستى ەرەكشەلىگى – ەلدىڭ زاماناۋي باسىمدىقتارىن، اتاپ ايتقاندا تسيفرلىق تەحنولوگيالاردى، جاساندى ينتەللەكتتى جانە ۆولونتەرلىك قوزعالىستى دامىتۋ باعىتتارىن ايقىندايتىن جاڭا نوميناتسيالاردىڭ ەنگىزىلۋى بولدى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ءوڭىر باسشىسىنىڭ اتىنان ءىس-شاراعا قاتىسۋشىلار مەن قوناقتاردى وبلىس اكىمىنىڭ ورىنباسارى دياس ەسداۋلەتوۆ قۇتتىقتادى.
- بۇگىندە جەتىسۋ وبلىسىندا 14 پەن 35 جاس ارالىعىندا 200 مىڭعا جۋىق جاس بار. ارالارىڭىزدا ەل دامۋىنا ەلەۋلى ۇلەس قوسىپ، قوعامدىق ومىرگە بەلسەندى ارالاسىپ جۇرگەن ازاماتتار از ەمەس. جىل سايىن ەڭبەكتەرىڭىزدى باعالاپ، ۇزدىكتەردى «كوشباسشى» جاستار سىيلىعىمەن ماراپاتتاۋ – يگى داستۇرگە اينالدى. بيىل بۇل ماراپاتتىڭ اۋقىمى كەڭەيدى. تسيفرلاندىرۋ جانە جاساندى ينتەللەكت جىلىنا وراي «ۇزدىك جاس تسيفرلىق كوشباسشى»، ال حالىقارالىق ۆولونتەرلەر جىلى اياسىندا «ۇزدىك جاس ۆولونتەر» نوميناتسيالارى ەنگىزىلدى. بۇل – ەلىمىزدىڭ تەحنولوگيالىق دامۋىن قولداپ قانا قويماي، قوعامداعى جاناشىرلىق پەن ىزگىلىك قۇندىلىقتارىن دارىپتەۋگە باعىتتالعان ماڭىزدى قادام، – دەدى د. ەسداۋلەتوۆ ماراپاتتاۋ ءراسىمىن باستاي وتىرىپ.
جاڭا «ۇزدىك جاس تسيفرلىق كوشباسشى» نوميناتسياسىنىڭ جەڭىمپازى سامال سەرىكوۆا اتاندى. ول «Future IT» مەكتەبىندە روبوتوتەحنيكا جاتتىقتىرۋشىسى بولىپ قىزمەت ەتەدى، سونداي-اق تالدىقورعان جوعارى پوليتەحنيكالىق كوللەدجىندە وقۋ ءىسى جونىندەگى مەڭگەرۋشى جانە ينفورماتيكا ءپانىنىڭ وقىتۋشىسى. ال «ۇزدىك جاس ەرىكتى» نوميناتسياسىنىڭ جەڭىمپازى بولىپ سارقان اۋدانىنداعى قوعامدىق جانە ەكولوگيالىق باستامالارعا بەلسەندى قاتىساتىن «قامقور» ۆولونتەرلىك ۇيىمىنىڭ جەتەكشىسى ۋليانا بوگۋش تانىلدى.
«ۇزدىك جاس سپورتشى» نوميناتسياسىنىڭ جەڭىمپازى – سۋردو گرەك-ريم كۇرەسىنەن الەم چەمپيونى، سۋردليمپيادا جانە ازيا-تىنىق مۇحيتى ويىندارىنىڭ جۇلدەگەرى، قازاقستان رەسپۋبليكاسىنىڭ بىرنەشە دۇركىن چەمپيونى، ۇلتتىق قۇرامانىڭ مۇشەسى رامازان ءابدراسىل بولدى.
ء«بىلىم جانە عىلىم سالاسىنداعى ۇزدىك جاس كوشباسشى» نوميناتسياسىندا تەكەلى قالاسىنداعى №3 ورتا مەكتەپتىڭ لوگوپەد-دەفەكتولوگى ناتاليا جەلەزنەۆا جەڭىمپاز اتاندى. پەداگوگيكا عىلىمدارىنىڭ ماگيسترى، بىلىكتى پەداگوگ ينكليۋزيۆتى ءبىلىم بەرۋدى دامىتۋ جولىندا جەمىستى ەڭبەك ەتىپ، ءاربىر بالانىڭ الەۋەتى مەن قابىلەتىن اشۋعا كۇش سالىپ كەلەدى.
ال «ۇزدىك جاس جۋرناليست» نوميناتسياسىنىڭ جەڭىمپازى – «DeFacto MediaHub» ينكليۋزيۆتى اقپاراتتىق پورتالىنىڭ بەينەوپەراتورى ءارى بەينەمونتاجەرى، سونداي-اق «مەندەي بول» جوباسىنىڭ اۆتورى سۇلتان قاليبەكوۆ بولدى.
جالپى قوعامدىق، الەۋمەتتىك-ەكونوميكالىق جانە مادەني دامۋىنا ەلەۋلى ۇلەس قوسىپ جۇرگەن جەڭىمپازدار 16 نوميناتسيا بويىنشا ماراپاتتالدى.
«ۇزدىك جاس باتىر» نوميناتسياسىنىڭ جەڭىمپازى، وبلىستىق پوليتسيا دەپارتامەنتى جەدەل قيمىلدايتىن ارنايى جاساعىنىڭ اعا ينسپەكتورى، پوليتسيا مايورى جاقسىلىق سارسەنوۆ ءوز اسەرىمەن ءبولىستى.
– بيىلعى جىلدىڭ 15 ماۋسىمىندا كوكتۇما اۋىلىنا قىزمەتتىك ىسساپارمەن بارعان بولاتىنبىز. كەشكى ساعات 17.00 شاماسىندا اۋا رايى بۇزىلىپ، جەل كوتەرىلىپ، الاكولدە ۇلكەن تولقىن پايدا بولدى. جاعالاۋدان شامامەن 500 مەتر قاشىقتىققا ءتورت ازاماتتى اعىن الىپ كەتتى. ەش ويلانباستان سۋعا سەكىردىم. الدىمەن ءجاسوسپىرىم قىزدى، كەيىن ونىڭ اناسىن قۇتقاردىم. ءۇشىنشى رەت تاعى ەكى ادامدى قۇتقارۋ ءۇشىن سۋعا كىردىك. مەن بۇل ارەكەتىمدى ەرلىك دەپ ەسەپتەمەيمىن. مەنىڭ ورنىمدا كەز كەلگەن ادام ءدال وسىلاي ارەكەت ەتەر ەدى دەپ ويلايمىن. ويتكەنى مەنىڭ باستى مىندەتىم – حالىققا قىزمەت ەتۋ، ولاردىڭ قاۋىپسىزدىگىن قامتاماسىز ەتۋ. دەگەنمەن كورسەتىلگەن قۇرمەت پەن ىقىلاس ءۇشىن شىن جۇرەكتەن العىسىمدى بىلدىرەمىن، – دەدى ول.
ءوز پىكىرىن «ۇزدىك جاس وتباسى» نوميناتسياسىنىڭ جەڭىمپازى اتانعان تەكەلى قالاسىنداعى كوپبالالى ورازالينوۆتار وتباسى دا ءبىلدىردى. ەرلى-زايىپتى قۋانىش پەن بوتاگوز مەديتسينا سالاسىندا ەڭبەك ەتەدى، ءتورت بالا تاربيەلەپ وتىر.
– شىنىمدى ايتسام، ءبىزدىڭ وتباسىمىزدىڭ وسى بەدەلدى سىيلىقتىڭ لاۋرەاتى اتانعانىنا ءالى دە سەنە الار ەمەسپىز. ءبىز تەكەلى قالاسىندا تۇرامىز. جولداسىم – فەلدشەر، ءوزىم قالالىق ەمحانادا مەيىرگەر بولىپ جۇمىس ىستەيمىن. ۇلكەن قىزىمىز ايزادا، ۇلىمىز ءامىر، ايانا جانە كەنجە قىزىمىز ەرزادا بار. بالالارىمىزدى ەلىمىزدىڭ لايىقتى ازاماتتارى ەتىپ تاربيەلەۋگە، ولاردى ءبىر-بىرىنە قامقور بولۋعا، اينالاسىنداعىلارعا جاناشىرلىق تانىتۋعا، ۇلكەندەردى قۇرمەتتەۋگە، تۋعان قالاسى مەن تۋعان ەلىن سۇيۋگە، جاۋاپكەرشىلىك پەن ماقساتكەرلىككە باۋلۋعا تىرىسامىز. بىزگە سەنىم ءبىلدىرىپ، قولداۋ كورسەتكەن بارشا جانعا العىسىمدى بىلدىرەمىن. بۇل – بۇكىل وتباسىمىز ءۇشىن ۇلكەن ءارى قۋانىشتى وقيعا، – دەدى بوتاگوز ورازالينوۆا.
مەرەكەلىك باعدارلاما قازاقستاندىق ەسترادا جۇلدىزدارىنىڭ قاتىسۋىمەن وتكەن كونتسەرتپەن جالعاستى.
ماراپاتتاۋ راسىمىنەن بولەك، قاتىسۋشىلار ءۇشىن تاقىرىپتىق الاڭدار، ترەنينگتەر، مەملەكەتتىك باعدارلامالار بويىنشا كونسۋلتاتسيالار، بوس جۇمىس ورىندارى جارمەڭكەسى، سپورتتىق جارىستار جانە ينتەراكتيۆتى ايماقتار ۇيىمداستىرىلدى.
سونىمەن قاتار، وبلىستىڭ بارلىق اۋدان مەن قالاسىندا وتكەن «Qosyl Fest» جاستار فەستيۆالىنىڭ قورىتىندىسى شىعارىلىپ، وعان 18 مىڭنان استام جاس قامتىلدى. فەستيۆال اياسىندا 230-دان استام ادام جۇمىسقا ورنالاستىرىلدى، مىڭداعان قاتىسۋشى مەملەكەتتىك قولداۋ شارالارى، جۇمىسپەن قامتۋ، قۇقىقتىق كومەك ماسەلەلەرى بويىنشا كەڭەس الدى، سونداي-اق «ادال ازامات» جوباسى مەن ۆولونتەرلىك قىزمەت اياسىندا وقىتۋدان ءوتتى.
مەرەكەلىك ءىس-شارا «تازا قازاقستان» باعدارلاماسى اياسىنداعى ەكولوگيالىق اكتسيامەن اياقتالىپ، ونىڭ بارىسىندا جاستار وزەن جاعالاۋىن تازالاۋ جۇمىستارىن جۇرگىزدى.
