Jetısu oblysynda Halyqaralyq jastar künıne orai oblys äkımınıŋ jyl saiynǧy «Köşbasşy – 2026» jastar syilyǧynyŋ laureattaryn saltanatty marapattau räsımı öttı. Is-şara Taldyqorǧan qalasyndaǧy Qaratal özenınıŋ jaǧalauynda ūiymdastyryldy. Biylǧy jyldyŋ basty erekşelıgı – eldıŋ zamanaui basymdyqtaryn, atap aitqanda sifrlyq tehnologiialardy, jasandy intellekttı jäne volonterlık qozǧalysty damytu baǧyttaryn aiqyndaityn jaŋa nominasiialardyŋ engızıluı boldy, – dep habarlaidy Jetısu oblysy äkımınıŋ baspasöz qyzmetı.
Öŋır basşysynyŋ atynan ıs-şaraǧa qatysuşylar men qonaqtardy oblys äkımınıŋ orynbasary Dias Esdäuletov qūttyqtady.
- Bügınde Jetısu oblysynda 14 pen 35 jas aralyǧynda 200 myŋǧa juyq jas bar. Aralaryŋyzda el damuyna eleulı üles qosyp, qoǧamdyq ömırge belsendı aralasyp jürgen azamattar az emes. Jyl saiyn eŋbekterıŋızdı baǧalap, üzdıkterdı «Köşbasşy» jastar syilyǧymen marapattau – igı dästürge ainaldy. Biyl būl marapattyŋ auqymy keŋeidı. Sifrlandyru jäne jasandy intellekt jylyna orai «Üzdık jas sifrlyq köşbasşy», al Halyqaralyq volonterler jyly aiasynda «Üzdık jas volonter» nominasiialary engızıldı. Būl – elımızdıŋ tehnologiialyq damuyn qoldap qana qoimai, qoǧamdaǧy janaşyrlyq pen ızgılık qūndylyqtaryn därıpteuge baǧyttalǧan maŋyzdy qadam, – dedı D. Esdäuletov marapattau räsımın bastai otyryp.
Jaŋa «Üzdık jas sifrlyq köşbasşy» nominasiiasynyŋ jeŋımpazy Samal Serıkova atandy. Ol «Future IT» mektebınde robototehnika jattyqtyruşysy bolyp qyzmet etedı, sondai-aq Taldyqorǧan joǧary politehnikalyq kolledjınde oqu ısı jönındegı meŋgeruşı jäne informatika pänınıŋ oqytuşysy. Al «Üzdık jas erıktı» nominasiiasynyŋ jeŋımpazy bolyp Sarqan audanyndaǧy qoǧamdyq jäne ekologiialyq bastamalarǧa belsendı qatysatyn «Qamqor» volonterlık ūiymynyŋ jetekşısı Uliana Boguş tanyldy.
«Üzdık jas sportşy» nominasiiasynyŋ jeŋımpazy – surdo grek-rim küresınen älem chempiony, Surdlimpiada jäne Aziia-Tynyq mūhity oiyndarynyŋ jüldegerı, Qazaqstan Respublikasynyŋ bırneşe dürkın chempiony, ūlttyq qūramanyŋ müşesı Ramazan Äbdrasıl boldy.
«Bılım jäne ǧylym salasyndaǧy üzdık jas köşbasşy» nominasiiasynda Tekelı qalasyndaǧy №3 orta mekteptıŋ logoped-defektologı Natalia Jelezneva jeŋımpaz atandy. Pedagogika ǧylymdarynyŋ magistrı, bılıktı pedagog inkliuzivtı bılım berudı damytu jolynda jemıstı eŋbek etıp, ärbır balanyŋ äleuetı men qabıletın aşuǧa küş salyp keledı.
Al «Üzdık jas jurnalist» nominasiiasynyŋ jeŋımpazy – «DeFacto MediaHub» inkliuzivtı aqparattyq portalynyŋ beineoperatory ärı beinemontajerı, sondai-aq «Mendei bol» jobasynyŋ avtory Sūltan Qalibekov boldy.
Jalpy qoǧamdyq, äleumettık-ekonomikalyq jäne mädeni damuyna eleulı üles qosyp jürgen jeŋımpazdar 16 nominasiia boiynşa marapattaldy.
«Üzdık jas batyr» nominasiiasynyŋ jeŋımpazy, oblystyq Polisiia departamentı jedel qimyldaityn arnaiy jasaǧynyŋ aǧa inspektory, polisiia maiory Jaqsylyq Särsenov öz äserımen bölıstı.
– Biylǧy jyldyŋ 15 mausymynda Köktūma auylyna qyzmettık ıssaparmen barǧan bolatynbyz. Keşkı saǧat 17.00 şamasynda aua raiy būzylyp, jel köterılıp, Alakölde ülken tolqyn paida boldy. Jaǧalaudan şamamen 500 metr qaşyqtyqqa tört azamatty aǧyn alyp kettı. Eş oilanbastan suǧa sekırdım. Aldymen jasöspırım qyzdy, keiın onyŋ anasyn qūtqardym. Üşınşı ret taǧy ekı adamdy qūtqaru üşın suǧa kırdık. Men būl äreketımdı erlık dep eseptemeimın. Menıŋ ornymda kez kelgen adam däl osylai äreket eter edı dep oilaimyn. Öitkenı menıŋ basty mındetım – halyqqa qyzmet etu, olardyŋ qauıpsızdıgın qamtamasyz etu. Degenmen körsetılgen qūrmet pen yqylas üşın şyn jürekten alǧysymdy bıldıremın, – dedı ol.
Öz pıkırın «Üzdık jas otbasy» nominasiiasynyŋ jeŋımpazy atanǧan Tekelı qalasyndaǧy köpbalaly Orazalinovtar otbasy da bıldırdı. Erlı-zaiypty Quanyş pen Botagöz medisina salasynda eŋbek etedı, tört bala tärbielep otyr.
– Şynymdy aitsam, bızdıŋ otbasymyzdyŋ osy bedeldı syilyqtyŋ laureaty atanǧanyna älı de sene alar emespız. Bız Tekelı qalasynda tūramyz. Joldasym – feldşer, özım qalalyq emhanada meiırger bolyp jūmys ısteimın. Ülken qyzymyz Aizada, ūlymyz Ämır, Aiana jäne kenje qyzymyz Erzada bar. Balalarymyzdy elımızdıŋ laiyqty azamattary etıp tärbieleuge, olardy bır-bırıne qamqor boluǧa, ainalasyndaǧylarǧa janaşyrlyq tanytuǧa, ülkenderdı qūrmetteuge, tuǧan qalasy men tuǧan elın süiuge, jauapkerşılık pen maqsatkerlıkke bauluǧa tyrysamyz. Bızge senım bıldırıp, qoldau körsetken barşa janǧa alǧysymdy bıldıremın. Būl – bükıl otbasymyz üşın ülken ärı quanyşty oqiǧa, – dedı Botagöz Orazalinova.
Merekelık baǧdarlama qazaqstandyq estrada jūldyzdarynyŋ qatysuymen ötken konsertpen jalǧasty.
Marapattau räsımınen bölek, qatysuşylar üşın taqyryptyq alaŋdar, treningter, memlekettık baǧdarlamalar boiynşa konsultasiialar, bos jūmys oryndary järmeŋkesı, sporttyq jarystar jäne interaktivtı aimaqtar ūiymdastyryldy.
Sonymen qatar, oblystyŋ barlyq audan men qalasynda ötken «Qosyl Fest» jastar festivalınıŋ qorytyndysy şyǧarylyp, oǧan 18 myŋnan astam jas qamtyldy. Festival aiasynda 230-dan astam adam jūmysqa ornalastyryldy, myŋdaǧan qatysuşy memlekettık qoldau şaralary, jūmyspen qamtu, qūqyqtyq kömek mäselelerı boiynşa keŋes aldy, sondai-aq «Adal azamat» jobasy men volonterlık qyzmet aiasynda oqytudan öttı.
Merekelık ıs-şara «Taza Qazaqstan» baǧdarlamasy aiasyndaǧy ekologiialyq aksiiamen aiaqtalyp, onyŋ barysynda jastar özen jaǧalauyn tazalau jūmystaryn jürgızdı.
