قوعامنىڭ وركەنيەتتىك دەڭگەيىن ونىڭ ەڭ وسال ازاماتتارىنا جاساعان جاعدايىنان باعالاۋعا بولادى. بۇگىندە ينكليۋزيا ۇعىمى الەۋمەتتىك قولداۋدىڭ تار شەڭبەرىنەن شىعىپ، ازاماتتىڭ قوعامداعى ورنىن، ونىڭ ءبىلىم الۋعا، ەڭبەك ەتۋگە، ءوز قابىلەتىن جۇزەگە اسىرۋعا جانە دەربەس ءومىر سۇرۋگە دەگەن قۇقىعىن ايقىندايتىن ماڭىزدى ولشەمگە اينالدى.
شىعىس قازاقستان وبلىسىندا «اۋىل» پارتياسىنىڭ توراعاسى قايرات ايتۋعانوۆتىڭ ينكليۋزيۆتى قاۋىمداستىق وكىلدەرىمەن كەزدەسۋى وسى ماسەلەلەردىڭ قوعام ءۇشىن قانشالىقتى وزەكتى ەكەنىن تاعى ءبىر كورسەتتى.
قر قۇرىلتايى دەپۋتاتتىعىنا كانديداتتارمەن كەزدەسۋگە ينكليۋزيۆتى قاۋىمداستىق وكىلدەرى، مۇگەدەكتىگى بار ازاماتتار، ەرەكشە ءبىلىم بەرۋ قاجەتتىلىكتەرى بار بالالاردىڭ اتا-انالارى، قوعامدىق بىرلەستىكتەر مەن ۇكىمەتتىك ەمەس ۇيىمداردىڭ وكىلدەرى قاتىستى. اڭگىمە بارىسىندا قولجەتىمدى ورتانى دامىتۋ، ينكليۋزيۆتى ءبىلىم بەرۋدى جەتىلدىرۋ، كاسىپتىك دايارلاۋ مەن جۇمىسپەن قامتۋ، بالا مەن وتباسىن ۇزدىكسىز سۇيەمەلدەۋ، مەملەكەتتىك ورگاندار مەن ازاماتتىق قوعام ينستيتۋتتارىنىڭ ءوزارا ءىس-قيمىلىن كۇشەيتۋ سياقتى ءبىر-بىرىمەن ساباقتاس ماسەلەلەر كوتەرىلدى.
بۇل ماسەلەلەردىڭ ارقايسىسى جەكە قاراعاندا الەۋمەتتىك سالانىڭ مىندەتى سەكىلدى كورىنۋى مۇمكىن. الايدا، ولاردىڭ تۇيىسەتىن تۇسى بىرەۋ – ادامنىڭ قوعامنان شەت قالماۋى. سوندىقتان ينكليۋزيانى تەك جەكەلەگەن ساناتتارعا ارنالعان جەڭىلدىكتەر نەمەسە الەۋمەتتىك تولەمدەر جۇيەسى رەتىندە قابىلداۋ جەتكىلىكسىز.
كەزدەسۋدە قۇرىلتاي دەپۋتاتتىعىنا كانديدات، «اۋىل» پارتياسىنىڭ توراعاسى قايرات ايتۋعانوۆ ينكليۋزيانىڭ ءمانىن ءدال وسى تۇرعىدان باعالادى. ونىڭ ايتۋىنشا، ينكليۋزيا قايىرىمدىلىققا نەمەسە ءبىر رەتتىك الەۋمەتتىك اكتسيالارعا نەگىزدەلمەۋى ءتيىس. ونىڭ وزەگى – ءار ازاماتتىڭ ءبىلىم الۋعا، ەڭبەك ەتۋگە، ەركىن ءجۇرىپ-تۇرۋعا، شىعارماشىلىقپەن اينالىسۋعا جانە قوعامدىق ومىرگە وزگەلەرمەن تەڭ دارەجەدە قاتىسۋىنا ناقتى مۇمكىندىك جاساۋ.
بۇل جەردە ماڭىزدى ماسەلە – مەملەكەتتىڭ الەۋمەتتىك قىزمەت كورسەتۋ ءتاسىلى. قازىرگى جاعدايدا اتا-انالار مەن وتباسىلار ءارتۇرلى مەكەمەلەرگە جۇگىنىپ، ءبىر ماسەلەنى بىرنەشە رەت ءتۇسىندىرىپ، قاجەتتى قۇجاتتاردى قايتا-قايتا جيناۋعا ءماجبۇر بولاتىن جاعدايلار كەزدەسەدى. ەرەكشە قاجەتتىلىگى بار بالا تاربيەلەپ وتىرعان وتباسى ءۇشىن بۇل قوسىمشا اۋىرتپالىق. كەزدەسۋدە دە وسى ماسەلە كوتەرىلىپ، وتباسىعا مەديتسينالىق، ءبىلىم بەرۋ جانە الەۋمەتتىك باعىتتار بويىنشا كەشەندى ءارى ۇزدىكسىز سۇيەمەلدەۋ قاجەت ەكەنى ايتىلدى.
ينكليۋزيا تۋرالى ءسوز بولعاندا، كوبىنە ءبىرىنشى كەزەكتە پاندۋستار، ارنايى كىرەبەرىستەر نەمەسە عيماراتتاردىڭ فيزيكالىق قولجەتىمدىلىگى ەسكە تۇسەدى. ارينە، بۇل – ماڭىزدى تالاپ. بىراق، شىن مانىندەگى قولجەتىمدى ورتا - ادامنىڭ ءومىردىڭ بارلىق سالاسىنا قاتىسۋ مۇمكىندىگىن قامتيدى.
«ينكليۋزيا - پاندۋسپەن شەكتەلمەيدى. ول ادامنىڭ ءبىلىم الىپ، ەڭبەك ەتىپ، ءوز قابىلەتىن دامىتىپ، قوعام ومىرىنە وزگەلەرمەن تەڭ دارەجەدە قاتىسۋىنا ناقتى مۇمكىندىك جاسالعان ساتتەن باستالادى»، – دەدى «اۋىل» پارتياسىنىڭ توراعاسى قايرات ايتۋعانوۆ.
كەزدەسۋدە قايرات ايتۋعانوۆ نەگىزگى ماقسات تەك پارتيانىڭ سايلاۋالدى باعدارلاماسىن تانىستىرۋ عانا ەمەس، ەڭ الدىمەن، ينكليۋزيۆتى قاۋىمداستىقتىڭ ۇسىنىستارىن تىڭداۋ ەكەنىن اتاپ ءوتتى. ويتكەنى، كۇندەلىكتى ومىردەگى ناقتى قيىندىقتاردى باستان وتكەرىپ جۇرگەن اتا-انالار مەن ازاماتتاردىڭ ۇسىنىستارى زاڭنامالىق شەشىمدەر ءۇشىن قۇندى نەگىز بولا الادى.
شىعىس قازاقستانداعى تاجىريبە دە قوعام مەن مەملەكەتتىك ينستيتۋتتار اراسىنداعى بايلانىستىڭ ماڭىزىن كورسەتەدى. شقو فيليالى توراعاسى، قۇرىلتاي دەپۋتاتتىعىنا كانديدات فاريد ابىتاەۆ وڭىرلىك فيليالدىڭ بىرنەشە جىلدان بەرى قوعامدىق ۇيىمدارمەن بىرلەسىپ ينكليۋزيۆتى جوبالاردى جۇيەلى تۇردە جۇزەگە اسىرىپ كەلە جاتقانىن ايتتى. ولاردىڭ قاتارىندا «بۋدەم جيت!» فەستيۆالى مەن جىل سايىن وتكىزىلەتىن مياپ ينكليۋزيا فەستيۆالى بار. بۇل باستامالار مۇگەدەكتىگى بار ازاماتتاردىڭ شىعارماشىلىق قابىلەتىن اشۋعا، قوعاممەن ەركىن ارالاسۋىنا جانە الەۋمەتتىك بەيىمدەلۋىنە مۇمكىندىك بەرەتىن الاڭ رەتىندە سيپاتتالدى.
الايدا قوعامدىق ءىس-شارالار مەن فەستيۆالدەر ماسەلەنىڭ ءبىر عانا قىرىن قامتيدى. ينكليۋزيانىڭ ۇزاق مەرزىمدى ناتيجەسى ادامنىڭ ەكونوميكالىق دەربەستىگىمەن دە تىكەلەي بايلانىستى. وسى ورايدا قۇرىلتاي دەپۋتاتتىعىنا كانديدات زاحيرا بەگاليەۆا الەۋمەتتىك قولداۋدى تەك تولەمدەرمەن شەكتەمەۋ قاجەتتىگىنە نازار اۋداردى.
شىن مانىندە، الەۋمەتتىك ساياساتتىڭ ەڭ جوعارى ناتيجەسى – ازاماتتىڭ تۇراقتى ءومىر سۇرۋگە مۇمكىندىك الۋى. كاسىپتىك ءبىلىم، بەيىمدەلگەن جۇمىس ورىندارى، جۇمىس بەرۋشىلەرگە قولداۋ كورسەتۋ، الەۋمەتتىك كاسىپكەرلىكتى دامىتۋ جانە تۇراقتى جۇمىسپەن قامتۋدىڭ ءتيىمدى تەتىكتەرى وسى مىندەتتى جۇزەگە اسىرۋعا باعىتتالۋى ءتيىس.
قورىتا ايتقاندا، ينكليۋزيا – بەلگىلى ءبىر الەۋمەتتىك توپقا جاسالعان جەڭىلدىك ەمەس، قوعامنىڭ ءار مۇشەسىنە بەرىلەتىن مۇمكىندىك. سوندىقتان، بۇگىنگى مىندەت – ينكليۋزيا تۋرالى ايتۋمەن شەكتەلمەي، ونى كۇندەلىكتى ءومىردىڭ قالىپتى قاعيداسىنا اينالدىرۋ. مۇمكىندىك تەڭ بولعان جەردە ادامنىڭ الەۋەتى دە تولىق اشىلادى. ال ءوز ازاماتتارىنىڭ الەۋەتىن ىسكە اسىرۋعا جاعداي جاساعان قوعام عانا شىن مانىندە ادىلەتتى ءارى ورنىقتى بولاشاق قۇرماق.
كەزدەسۋ سوڭىندا ينكليۋزيۆتى قاۋىمداستىق وكىلدەرى، قوعامدىق ۇيىمدار مەن اتا-انالار وتباسىنى سۇيەمەلدەۋ جۇيەسىن جەتىلدىرۋ، قولجەتىمدى ورتانى دامىتۋ، ينكليۋزيۆتى ءبىلىم بەرۋ جانە مۇگەدەكتىگى بار ازاماتتاردى جۇمىسپەن قامتۋ جونىندەگى ۇسىنىستارىن ورتاعا سالدى. ۇسىنىستاردى الداعى ۋاقىتتا «اۋىل» پارتياسى تاراپىنان زاڭنامالىق باستامالاردى ازىرلەۋ كەزىندە قامتۋ كوزدەلىپ وتىر.
شىعارعان ۇيىم: «اۋىل» پارتياسى» رەسپۋبليكالىق قوعامدىق بىرلەستىگى
تاپسىرىس بەرۋشى: «اۋىل» پارتياسى» رەسپۋبليكالىق قوعامدىق بىرلەستىگى
تولەندى: «اۋىل» پارتياسى» رەسپۋبليكالىق قوعامدىق بىرلەستىگىنىڭ سايلاۋ قورىنىڭ قاراجاتى ەسەبىنەن.
