فوتو: WWBT/AP
اقش-تىڭ ۆيردجينيا شتاتىنداعى ريچموند قالاسىنان شامامەن 32 شاقىرىم جەردەگى ۋنيۆەرسيتەت كامپۋسىندا سەنبى كۇنى تاڭەرتەڭ اتىس بولىپ، بەس ادام جاراقات الدى. وقيعادان كەيىن وقۋ ورنىنىڭ اۋماعى ۋاقىتشا جابىلدى. بۇل تۋرالى The Guardian جازدى، دەپ حابارلايدى "ادىرنا".
چەستەرفيلد وكرۋگىنىڭ پوليتسياسى وقيعا ورنىنا كەلگەندە، ستۋدەنتتەر جاتاقحانالارىنىڭ ماڭىنان وق جاراقاتىن العان بەس ادامدى تاپقان. زارداپ شەككەندەردىڭ بارلىعى جەرگىلىكتى اۋرۋحانالارعا جەتكىزىلدى. ولاردىڭ تورتەۋىنىڭ جاعدايى ومىرىنە قاۋىپ توندىرمەيتىنى بەلگىلى بولدى.
ۋنيۆەرسيتەت اكىمشىلىگىنىڭ حابارلاۋىنشا، اتىسقا بىرنەشە كۇدىكتى قاتىسۋى مۇمكىن. پوليتسيا دا كۇدىكتىلەردىڭ سانى ءبىر ادامنان كوپ بولۋى ىقتيمال ەكەنىن مالىمدەدى.
قازىرگى ۋاقىتتا اتىسقا قاتىسى بار دەگەن كۇدىكپەن ەشكىم ۇستالعان جوق. پوليتسيا وقيعانىڭ ءمان-جايىن انىقتاپ، كۇدىكتىلەردى ىزدەستىرۋ جۇمىستارىن جالعاستىرىپ جاتىر.
