«تازا قازاقستان» جالپىۇلتتىق يدەولوگياسى اياسىندا الاكول اۋدانى، اقشي اۋىلىندا «Taza Post – الاكول» ەكولوگيالىق اكتسياسى ۇيىمداستىرىلدى.
ءىس-شارانىڭ باستى ماقساتى – الاكول كولىنىڭ تابيعي تازالىعىن ساقتاۋ، قورشاعان ورتاعا جاۋاپكەرشىلىكپەن قاراۋ مادەنيەتىن قالىپتاستىرۋ جانە دەمالۋشىلاردى تابيعاتتى قورعاۋعا باعىتتالعان ناقتى ىسكە تارتۋ. ەكولوگيالىق باستاما ارقىلى كول جاعالاۋىنداعى تازالىقتى قامتاماسىز ەتۋ، تابيعي اۋماقتى تۇرمىستىق قالدىقتاردان تازارتۋ جانە تۇرعىندار مەن دەمالۋشىلاردىڭ ەكولوگيالىق مادەنيەتىن ارتتىرۋ كوزدەلدى.
اكتسيا بارىسىندا ارنايى نۇكتە ۇيىمداستىرىلىپ، دەمالۋشىلارعا ەكولوگيالىق بوكس تۇرىندەگى قاجەتتى قۇرالدار ۇسىنىلدى. بوكستاردىڭ قۇرامىنا قوقىس جيناۋعا ارنالعان قولعاپتار مەن قاپتار ەنگىزىلىپ، بالالار ءۇشىن شاعىن سىيلىقتار دا قاراستىرىلدى.
قاتىسۋشىلار بەرىلگەن قۇرالداردى پايدالانا وتىرىپ، الاكول كولىنىڭ جاعالاۋى مەن وعان ىرگەلەس اۋماقتارداعى شاشىلعان تۇرمىستىق قالدىقتاردى جيناپ، تازالىق جۇمىستارىنا اتسالىستى. دەمالۋشىلاردىڭ بەلسەندى قاتىسۋى قورشاعان ورتانى تازا ۇستاۋ ماسەلەسىنە دەگەن جاۋاپكەرشىلىكتىڭ جوعارى ەكەنىن كورسەتتى.
- ءىس-شارا بارىسىندا قاتىسۋشىلارعا قورشاعان ورتانى لاستاماۋ، قوقىستى ارنايى ورىندارعا تاستاۋ جانە دەمالىس ورىندارىن باستاپقى تازالىق كۇيىندە ساقتاۋ جونىندە ءتۇسىندىرۋ جۇمىستارى جۇرگىزىلدى. بۇل رەتتە اكتسيا تەك ءبىر كۇندىك تازالىق جۇمىستارىمەن شەكتەلمەي، ەكولوگيالىق جاۋاپكەرشىلىكتى كۇندەلىكتى ادەتكە اينالدىرۋعا باعىتتالدى، – دەپ اتاپ ءوتتى جەتىسۋ وبلىسى بويىنشا «قازاقستان ستۋدەنتتەرىنىڭ اليانسى» ومبۋدسمەنى قىزايباي اقەركە دوسىمحانقىزى.
«Taza Post – الاكول» اكتسياسى اياسىندا جۇرگىزىلگەن جۇمىستار ناتيجەسىندە كول جاعالاۋىنىڭ بىرقاتار اۋماقتارى قوقىستان تازارتىلىپ، دەمالىس ورنىنىڭ سانيتارلىق جانە ەستەتيكالىق جاعدايىن جاقسارتۋعا ۇلەس قوسىلدى.
