قازاقستاندا سوڭعى 10 جىلدا ەكى عانا ءدارىنى (يود جانە كالي ءيوديدى) جاساۋعا 6 ميللياردقا جۋىق تەڭگە جۇمسالدى. دەگەنمەن، بۇل پرەپاراتتار دەنساۋلىق ساقتاۋ جۇيەسىندە ءالى دە قولدانىلمايدى جانە ەشقانداي مەديتسينالىق فورمۋليارعا ەنگىزىلمەگەن. بۇل تۋرالى ءماجىلىس دەپۋتاتى اسحات ايماعامبەتوۆ پارلامەنتتە سويلەگەن سوزىندە ايتتى.
ء“دارىنى تىركەۋ ءۇشىن، وتە كۇردەلى بيۋروكراتيالىق راسىمدەردەن ءوتۋ كەرەك. ارينە مۇنداي قيىندىقتاردان ءوتۋ، تەك الپاۋىت فارماتسەۆتيكالىق كومپانيالار جانە قىمبات پرەپاراتتار ءۇشىن مۇمكىن. ناتيجەسىندە، ارزان، بىراق ناۋقاستار ءۇشىن اۋاداي قاجەت دارىلەر تىركەلمەي قالادى. ويتكەنى ول ءۇشىن جۇگىرەتىن ىنتا دا جوق، قىزىعۋشىلىق تا جوق”، - دەدى ءماجىلىس دەپۋتاتى اسحات ايماعامبەتوۆ.
فارماتسەۆتيكا سالاسىنداعى بار بىلىقتى دەپۋتاتتار الدىنا جايىپ سالعان جوعارى اۋديتورلىق پالاتا سالانىڭ ابدەن قوجىراعانىن ايتتى. 45 مىڭ پاتسيەنت دەرتىنە داۋا بولاتىن ءدارىسىن تاپپاي ساندالىپ قالعان.
“ماسەلەن 2024 جىلى ەلىمىزدەگى مىنا نارىقتا بار ءدارى-دارمەكتىڭ 84 پايىزى شەتەلدىك ءونىم ەكەنى بەلگىلى بولدى. قالا بەردى مىنا سوڭعى 5 جىلدا ءبىزدىڭ شەتەلدەردەن ساتىپ العان ءدارى-دارمەككە جۇمساعانىمىز 1, ملرد دوللاردان 1,7 ملرد دوللارعا دەيىن جەتتى. ال ءوزىمىز بىلەمىز مەملەكەت باسشىسى وتاندىق ءدارى-دارمەكتىڭ ۇلەسى ەلۋ پايىز بولۋ كەرەك دەدى. بۇعان قالاي جەتپەك ەكەنى تۇسىنىكسىز”، - دەدى ءماجىلىس دەپۋتاتى نارتاي سارسەنعاليەۆ.
