18 تامىزدا اقش پرەزيدەنتى دونالد ترامپ ءوزىنىڭ Truth Social الەۋمەتتىك جەلىسىندە ورمۇز بۇعازى اقش اۋماعى رەتىندە بەلگىلەنگەن گەوگرافيالىق كارتانى جاريالادى، دەپ حابارلايدى «ادىرنا» ءتىلشىسى.
كارتادا بۇعاز شەڭبەرمەن قورشالىپ، جوعارعى بولىگىندە «اقش-تىڭ جاڭا اۋماعى» دەگەن جازۋ كورسەتىلگەن.
The Hill باسىلىمى بۇل جاريالانىمدى «ورمۇز بۇعازىن اننەكسيالاۋ جونىندەگى ۇندەۋلەرىن كۇشەيتۋگە باعىتتالعان ىقتيمال ارەكەت» دەپ باعالادى.
سوڭعى كۇندەرى ترامپ يرانعا قارسى تەڭىز بلوكاداسىنىڭ ارقاسىندا امەريكالىق اسكەري كۇشتەر ورمۇز بۇعازىن ءىس جۇزىندە باقىلاۋدا ۇستاپ وتىرعانىن بىرنەشە رەت مالىمدەگەن. سونداي-اق ول بۇل ستراتەگيالىق ماڭىزى زور سۋ جولىن «اقش اۋماعى» دەپ جاريالاۋ نيەتىن دە بىرنەشە مارتە بىلدىرگەن. ال يران بيلىگى بۇعازدىڭ ءالى دە يراننىڭ باقىلاۋىندا ەكەنىن ۇنەمى اتاپ ءوتىپ كەلەدى.
بۇل ترامپتىڭ ەكىنشى پرەزيدەنتتىك مەرزىمى كەزىندە اقش اۋماعىن كەڭەيتۋگە قاتىستى مالىمدەمە جاساعان العاشقى جاعداي ەمەس. ماسەلەن 2026 جىلدىڭ قىسىندا ۆەنەسۋەلا پرەزيدەنتى نيكولاس مادۋرو تۇتقىندالعاننان كەيىن كوپ ۇزاماي ترامپ ءوزىن «ۆەنەسۋەلانىڭ ۋاقىتشا پرەزيدەنتى» دەپ اتاعان بولاتىن. سونىمەن قاتار ول كانادانىڭ اقش قۇرامىنا قوسىلعانىن قالايتىنىن ايتقان، الايدا بۇل يدەيا كانادا تۇرعىندارى مەن بيلىگىنىڭ قولداۋىنا يە بولمادى.
بۇعان قوسا ترامپ ۇلتتىق قاۋىپسىزدىك ماسەلەلەرىن العا تارتىپ، گرەنلانديانى اقش باقىلاۋىنا العىسى كەلەتىنىن دە مالىمدەگەن. كەيىن ناتو-نىڭ باس حاتشىسى مارك ريۋتتە اقش پرەزيدەنتىن گرەنلاندياعا قاتىستى ماسەلەلەردى وزگە، ىمىرالى جولدارمەن شەشۋگە كوندىرگەن.
وسى جىلدىڭ باسىندا ترامپ يران اۋماعىنىڭ ءبىر بولىگىن باسىپ الۋ مۇمكىندىگىن دە ايتقان ەدى. اتاپ ايتقاندا، ول پارسى شىعاناعىندا ورنالاسقان حارك ارالىن باقىلاۋعا الۋ وپەراتسياسى بولۋى مۇمكىن ەكەنىن مالىمدەگەن. بۇل ارال يران ءۇشىن ستراتەگيالىق ماڭىزعا يە، ويتكەنى وندا ءىرى مۇناي تەرمينالى ورنالاسقان.
