قازاقستاندا اتوم ەلەكتر ستانتسياسىن سالاتىن «روساتوم» كورپوراتسياسى مىسىرداعى اەس قۇرىلىسى جوباسىندا قاۋىپسىزدىك تالاپتارىن بۇزدى دەگەن ايىپقا ىلىكتى. بۇل تۋرالى امەريكالىق Politico باسىلىمى جازدى، دەپ حابارلايدى «ادىرنا» ءتىلشىسى.
باسىلىم مالىمەتىنشە، 4 ماۋسىمدا جولدانعان قۇپيا حاتتا مىسىردىڭ اتوم ەلەكتر ستانتسيالارى باسقارماسى «روساتوم» باسشىلىعىنا «ەل-داباا» اتوم ەلەكتر ستانتسياسىنىڭ بىرنەشە رەاكتور بلوگىندا انىقتالعان اقاۋلار مەن قۇرىلىس بارىسىندا يادرولىق قاۋىپسىزدىك مادەنيەتىنىڭ بۇزىلعانىن حابارلاعان.
قۇجاتتا كورسەتىلگەن نەگىزگى ماسەلەلەر:
قاۋىپسىزدىك تالاپتارىنىڭ بۇزىلۋى مەن تەحنيكالىق اقاۋلار. بىرنەشە رەاكتور بلوگىندا كەمشىلىكتەر انىقتالعانى جانە يادرولىق قاۋىپسىزدىك مادەنيەتىنە قاتىستى تالاپتاردىڭ ساقتالماعانى ايتىلعان.
«قاساقانا نەمقۇرايلىلىق» تۋرالى ايىپ. مىسىر تاراپى جوباعا جاۋاپتى لاۋازىمدى تۇلعالاردىڭ ءبىرىن قاساقانا سالعىرتتىق تانىتتى دەپ ايىپتاعان.
كىرۋ باقىلاۋىنداعى زاڭبۇزۋشىلىقتار. جالعان رۇقساتنامالاردى پايدالانۋ، قۇرىلىس الاڭىنا رۇقساتسىز كىرۋ، سونداي-اق نىساندا فوتو جانە بەينەتۇسىرىلىم جۇرگىزۋ فاكتىلەرى تىركەلگەن.
وندىرىستىك جاراقات وقيعاسى. اۋىر اشىق سىنىق العان جۇمىسشىنىڭ جەدەل جاردەم كولىگىمەن ەمەس، جەكە اۆتوكولىكپەن اۋرۋحاناعا جەتكىزىلگەنى كورسەتىلگەن.
ينجەنەرلىك قيىندىقتار مەن كەشىگۋلەر. «روساتومنىڭ» ىشكى ەسەپتەرىندە قۇرىلىس جۇمىستارىنىڭ كەشەۋىلدەپ جاتقانى جانە تەحنيكالىق قيىندىقتار بار ەكەنى ايتىلعان. اتاپ ايتقاندا، يادرولىق ارالدىڭ جەرۇستى نىساندارى ءالى دە جەراستى جۇمىستارىن جۇرگىزۋ كەزەڭىندە تۇر.
Politico اۆتورلارىنىڭ پىكىرىنشە، مىسىرداعى ماسەلەلەر ۆەنگرياعا جانە ۆيكتور وربان داۋىرىندە جاسالعان رەسەيمەن بايلانىستى كەلىسىمدەردى قايتا قاراستىرىپ جاتقان پرەمەر-مينيستر پەتەر ماديار ۇكىمەتىنە ەۋرووداق تاراپىنان قىسىمدى كۇشەيتۋى مۇمكىن.
ال «روساتوم» كورپوراتسياسى بۇل ايىپتاۋلاردىڭ بارلىعىن جوققا شىعارىپ وتىر. كومپانيا وكىلدەرىنىڭ مالىمدەۋىنشە، قۇرىلىس جۇمىستارى بەكىتىلگەن كەستەگە سايكەس جۇرگىزىلۋدە جانە مىسىر رەتتەۋشىسىنىڭ تالاپتارى مەن حالىقارالىق ستاندارتتارعا تولىق ساي كەلەدى.
ەسكە سالساق، قازاقستان مەن رەسەي الماتى وبلىسىنىڭ ۇلكەن اۋىلىندا ورنالاساتىن «بالقاش» اتوم ەلەكتر ستانتسياسىن سالۋ جونىندە كەلىسىمگە كەلگەن. جوبانى جۇزەگە اسىراتىن حالىقارالىق كونسورتسيۋمنىڭ جەتەكشىسى رەتىندە «روساتوم» تاڭدالعان.
