20 تامىزعا قاراعان ءتۇنى رەسەي اسكەرى كيەۆكە بالليستيكالىق زىمىراندارمەن شابۋىل جاسادى. كيەۆ قالالىق اسكەري اكىمشىلىگىنىڭ مالىمەتىنشە، شابۋىل سالدارىنان كەمىندە بەس ادام قازا تاۋىپ، 23 ادام جاراقات العان، دەپ حابارلايدى «ادىرنا» ءتىلشىسى DW-گە سىلتەمە جاساپ.
بۇعان دەيىن ۋكراينا استاناسىنىڭ مەرى ۆيتالي كليچكو ءۇش ادامنىڭ قازا تاۋىپ، 20 ادامنىڭ زارداپ شەككەنىن مالىمدەگەن بولاتىن.
«ولاردىڭ 14-ءى اۋرۋحاناعا جاتقىزىلدى. قالعاندارىنا مەديتسينالىق كومەك امبۋلاتوريالىق جاعدايدا نەمەسە وقيعا ورنىندا كورسەتىلدى»، – دەپ جازدى كليچكو ءوزىنىڭ Telegram-ارناسىندا.
سولومەن اۋدانىندا زىمىران سىنىقتارى بەس قاباتتى تۇرعىن ءۇيدىڭ ماڭىنا قۇلاعان. عيماراتتىڭ تەرەزەلەرى سىنعان، ءورت شىققان. ۆيتالي كليچكونىڭ ايتۋىنشا، توعىز قاباتتى تۇرعىن ءۇي دە سوققىعا ۇشىراپ، ونىڭ جوعارعى قاباتتارى قيراعان.
تاعى ءبىر مەكەنجايداعى پانالاۋ ورنىندا ادامدار قامالىپ قالعان. سول اۋداندا بالالار اۋرۋحاناسىنىڭ عيماراتى زاقىمدانىپ، مەديتسينالىق مەكەمە اۋماعىنداعى اۆتوكولىكتەر ورتەنگەن.
دارنيتسكي جانە سۆياتوشين اۋداندارىندا تۇرعىن ەمەس عيماراتتاردان ءورت شىققان.
ۋكراينانىڭ Telegram-ارنالارى كيەۆ وبلىسىنداعى بروۆارى قالاسىنداعى قويمالارعا دا سوققى جاسالعانىن حابارلادى.
