ۇلىتاۋ وبلىسىندا ءبىلىم بەرۋ ينفراقۇرىلىمىن دامىتۋ اياسىندا بىرقاتار جاڭا مەكتەپتەر مەن بالاباقشالار سالۋ جوسپارلانۋدا. بۇل تۋرالى تامىز پەداگوگيكالىق كونفەرەنتسياسىندا ۇلىتاۋ وبلىسىنىڭ اكىمى ەسەت بايكەن ايتتى.
ءوڭىر باسشىسىنىڭ ايتۋىنشا، بيىل جەزقازعان قالاسىنىڭ باتىس اۋدانىندا 1 000 ورىندىق BINOM مەكتەبىنىڭ قۇرىلىسى باستالادى. سونىمەن قاتار جاڭاارقا اۋدانىندا 600 ورىندىق، تۇگىسكەن اۋىلىندا 300 ورىندىق، جەزقازعان قالاسىندا 900 ورىندىق جانە ساتباەۆ قالاسىندا 600 ورىندىق مەكتەپ سالۋ جوسپارلانعان.
بۇدان بولەك ۇلدارعا جانە قىزدارعا ارنالعان ء«بىلىم-يننوۆاتسيا» مامانداندىرىلعان ليتسەيلەرى ينتەرنات-جاتاقحانالارىمەن بىرگە سالىنادى.
وڭىردە نازارباەۆ زياتكەرلىك مەكتەبىن اشۋ دا جوسپارلانىپ وتىر.
مەكتەپكە دەيىنگى ءبىلىم بەرۋ ينفراقۇرىلىمى دا كەڭەيتىلەدى. جەزقازعان قالاسىنىڭ كەڭگىر اۋىلىندا 320 ورىندىق، ساتباەۆ قالاسىندا 280 ورىندىق جاڭا بالاباقشالاردىڭ قۇرىلىسى باستالادى.
سونداي-اق جاڭا وقۋ جىلىندا قاراجال قالاسىندا جانە جاڭاارقا اۋدانىنىڭ مانادىر ستانتسياسىندا جاڭا مەكتەپتەر پايدالانۋعا بەرىلەدى.
جاڭا ءبىلىم بەرۋ نىساندارى وقۋشى ورىندارىنىڭ تاپشىلىعىن ازايتىپ، بالالاردىڭ ساپالى ءبىلىم الۋىنا زاماناۋي جاعداي جاساۋعا مۇمكىندىك بەرەدى.
