ۇلىتاۋ وبلىسىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2026 جىلعى 28 قازانداعى «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىنىڭ نەگىزگى باعىتتارىن تۇسىندىرۋگە ارنالعان رەسپۋبليكالىق اقپاراتتىق-ءتۇسىندىرۋ توبىنىڭ ءوڭىر تۇرعىندارىمەن كەزدەسۋى ءوتتى.
ءىس-شاراعا قۇرىلتاي دەپۋتاتى دارحان احماديەۆ، ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەلدار كۇزەنباەۆ جانە حالىق كەڭەسىنىڭ مۇشەسى امانجول ءالتاي قاتىستى.
كەزدەسۋ بارىسىندا قاتىسۋشىلار مەملەكەت باسشىسى ايقىنداعان باسىم باعىتتاردى، اتاپ ايتقاندا، تسيفرلىق ترانسفورماتسيا، جاساندى ينتەللەكتىنى دامىتۋ، حالىقتىڭ ءال-اۋقاتىن ارتتىرۋ، جۇمىسپەن قامتۋدى قامتاماسىز ەتۋ، الەۋمەتتىك ينفراقۇرىلىمدى جەتىلدىرۋ جانە ادامي كاپيتالدى دامىتۋ ماسەلەلەرىن تالقىلادى.
جولداۋدا جۇكتەلگەن مىندەتتەردى ۇلىتاۋ وبلىسىنىڭ ەكونوميكالىق جانە الەۋمەتتىك الەۋەتىن ەسكەرە وتىرىپ جۇزەگە اسىرۋعا ەرەكشە نازار اۋدارىلدى.
قۇرىلتاي دەپۋتاتى دارحان احماديەۆ اتاپ وتكەندەي، پرەزيدەنت جولداۋى ەل ەكونوميكاسىن نىعايتۋعا، ازاماتتاردىڭ ءومىر ءسۇرۋ ساپاسىن ارتتىرۋعا جانە مەملەكەتتىك باسقارۋ جۇيەسىن جەتىلدىرۋگە باعىتتالعان ستراتەگيالىق دامۋ باعدارلارىن ايقىندايدى.
ماڭىزدى باعىتتاردىڭ ءبىرى – الەۋمەتتىك ينفراقۇرىلىمدى جاڭعىرتۋدى كوزدەيتىن «حالىقتىق قۇرىلىس» باعدارلاماسىن ىسكە اسىرۋ. باعدارلاما اياسىندا ءبىلىم بەرۋ، دەنساۋلىق ساقتاۋ، سپورت جانە مادەنيەت نىساندارىن سالۋ، سونداي-اق قوسىمشا جۇمىس ورىندارىن اشۋ قاراستىرىلعان.
كەزدەسۋگە قاتىسۋشىلار حالىقتى الەۋمەتتىك قولداۋ، مەديتسينا قىزمەتكەرلەرىنىڭ ەڭبەكاقىسىن ارتتىرۋ، ءبىلىم بەرۋ جۇيەسىن دامىتۋ جانە پەداگوگتەرگە تۇسەتىن اكىمشىلىك جۇكتەمەنى ازايتۋ ماسەلەلەرىنە دە ەرەكشە كوڭىل ءبولدى.
تالقىلاۋ بارىسىندا ەكونوميكانىڭ ءتۇرلى سالاسىن تسيفرلاندىرۋ مەن زاماناۋي تەحنولوگيالاردى ەنگىزۋدىڭ ماڭىزدىلىعى اتالىپ ءوتتى. ۇلىتاۋ وبلىسى ءۇشىن سۋ رەسۋرستارىن ۇتىمدى پايدالانۋ، ونەركاسىپتى جاڭعىرتۋ جانە تسيفرلىق ينفراقۇرىلىمدى دامىتۋ ماسەلەلەرى ايرىقشا وزەكتى.
سونىمەن قاتار ءوڭىر ەكونوميكاسىن ءارتاراپتاندىرۋ، ينۆەستيتسيا تارتۋ، شاعىن جانە ورتا بيزنەستى قولداۋ، ءتۋريزمدى دامىتۋ جانە جاستار ءۇشىن جاڭا جۇمىس ورىندارىن اشۋ پەرسپەكتيۆالارى قاراستىرىلدى.
ۇلىتاۋ وبلىسىندا بىرقاتار ءىرى الەۋمەتتىك جانە ينفراقۇرىلىمدىق جوبانى جۇزەگە اسىرۋ جۇمىستارى باستالىپ كەتتى. مەملەكەت باسشىسى قاسىم-جومارت توقاەۆتىڭ تاپسىرمالارىنا سايكەس جانە ۇكىمەتتىڭ قولداۋىمەن 30-عا جۋىق نىساندى جاڭعىرتۋ قولعا الىندى.
بۇل جوبالار ينجەنەرلىك ينفراقۇرىلىمدى جاڭارتۋعا، حالىقتىڭ ءومىر ءسۇرۋ ساپاسىن ارتتىرۋعا جانە ءوڭىردىڭ ودان ءارى دامۋىنا قولايلى جاعداي جاساۋعا باعىتتالعان.
وبلىستىڭ دامۋىندا كولىك ينفراقۇرىلىمى ماڭىزدى ورىن الادى. مەملەكەت باسشىسىنىڭ تاپسىرماسى بويىنشا «سامۇرىق-قازىنا» اق جەزقازعان جانە قاراجال قالالارىنداعى، جاڭاارقا اۋدانىنداعى جانە قىزىلجار ستانتسياسىنداعى ءتورت تەمىرجول ۆوكزالىن جاڭعىرتتى. جاڭارتىلعان نىساندار قايتا پايدالانۋعا بەرىلىپ، جولاۋشىلارعا قىزمەت كورسەتۋدە.
ءوڭىر ءۇشىن جەزقازعان – قىزىلوردا جانە جەزقازعان – ارقالىق اۆتوموبيل جولدارىنىڭ قۇرىلىسىن اياقتاپ، پايدالانۋعا بەرۋ ەرەكشە ماڭىزعا يە. بۇل جوبالار كولىك قاتىناسىن جاقسارتۋعا، جۇك جانە جولاۋشىلار تاسىمالىنا قولايلى جاعداي جاساۋعا، سونداي-اق ساۋدا-ەكونوميكالىق بايلانىستاردى كەڭەيتۋگە مۇمكىندىك بەرەدى. سونىمەن قاتار جەزقازعان – قاراعاندى اۆتوموبيل جولىنىڭ قۇرىلىسى جالعاسۋدا. جول جەلىسىن دامىتۋ وبلىستىڭ كولىك-لوگيستيكالىق الەۋەتىن نىعايتىپ، ينۆەستيتسيالىق تارتىمدىلىعىن ارتتىرۋعا ىقپال ەتەدى.
دەنساۋلىق ساقتاۋ سالاسىندا دا اۋقىمدى جۇمىستار اتقارىلۋدا. ۇلىتاۋ اۋىلىندا 20 توسەك-ورىندىق اۋرۋحانا مەن ءبىر اۋىسىمدا 100 ادام قابىلداۋعا ارنالعان ەمحانانىڭ قۇرىلىسى جۇرگىزىلۋدە. نىساندى وسى جىلدىڭ سوڭىنا دەيىن پايدالانۋعا بەرۋ جوسپارلانعان.
جەزقازعان قالاسىندا «Zhyly Zhurek» قورىنىڭ قولداۋىمەن بيىلعى شىلدە ايىنان باستاپ ءبىر اۋىسىمدا 250 ادام قابىلدايتىن جاڭا ەمحانا سالىنىپ جاتىر.
سونداي-اق وبلىس ورتالىعىنىڭ مەديتسينالىق ينفراقۇرىلىمىن جاڭعىرتۋ اياسىندا ونكولوگيالىق كورپۋس پەن پەريناتالدىق ورتالىق سالۋ كوزدەلگەن. قۇرىلىس-مونتاج جۇمىستارىن جاقىن ارادا باستاۋ جوسپارلانىپ وتىر.
بۇدان بولەك، «سامۇرىق-قازىنا» اق-مەن قول جەتكىزىلگەن كەلىسىمدەر اياسىندا جەزقازعاندا بالالارعا ارنالعان ينكليۋزيۆتى وڭالتۋ ورتالىعى مەن زاماناۋي ينكليۋزيۆتى سپورت كەشەنىن سالۋ جوسپارلانۋدا.
ءوڭىردىڭ سپورت، مادەنيەت جانە الەۋمەتتىك ينفراقۇرىلىمىن دامىتۋ جۇمىستارى دا جالعاسۋدا. اتاپ ايتقاندا، «Qarmet» اق قاراجال قالاسىندا بالاباقشا سالۋدى جوسپارلاپ وتىر. ال «قازاقمىس» كورپوراتسياسى 2027 جىلدىڭ ءبىرىنشى جارتىجىلدىعىندا جەزقازعاندا 800 ورىندىق كونگرەسس-ورتالىقتىڭ، تەننيس ورتالىعى مەن جاڭا ستاديوننىڭ قۇرىلىسىن باستاۋدى كوزدەپ وتىر.
اتالعان جوبالاردى جۇزەگە اسىرۋ ينفراقۇرىلىمدى دامىتۋعا، تۇرعىندار ءۇشىن جاڭا مۇمكىندىكتەر جاساۋعا جانە ۇلىتاۋ وبلىسىنىڭ الەۋمەتتىك-ەكونوميكالىق الەۋەتىن نىعايتۋعا باعىتتالعان.
