قازاقستاندا 1 قازاننان باستاپ ەلەكتر ەنەرگياسىنىڭ تاريفتەرى ءوسۋى مۇمكىن، دەپ حابارلايدى "ادىرنا" ءتىلشىسى.
«KEGOC» اق-نىڭ ءتاريفتى وزگەرتۋ تۋرالى ءوتىنىمىن تابيعي مونوپوليالاردى رەتتەۋ كوميتەتى قاراپ جاتىر.
بۇل تۋرالى «KEGOC» اق باسقارما توراعاسى ءنابي ايتجانوۆ ۇكىمەتتە وتكەن بريفينگتە مالىمدەدى. كومپانيا 1 قازاننان باستاپ بەس جىلدىق تاريفتىك باعدارلاما اياسىندا ءوز قىزمەتىنىڭ قۇنىن كوتەرۋدى جوسپارلاپ وتىر. الدىن الا بولجام بويىنشا، بيىل تاريف ءوسىمى 2 پايىزدان تومەن بولادى.
«الداعى بەس جىلدا ورتاشا تاريف شامامەن 11–13 پايىزعا ءوسۋى مۇمكىن. الايدا ناقتى كورسەتكىش ازىرگە بەلگىسىز. قازىر ءوتىنىمدى تابيعي مونوپوليالاردى رەتتەۋ كوميتەتى قاراستىرىپ جاتىر»، – دەدى ءنابي ايتجانوۆ.
ونىڭ ايتۋىنشا، ءتيىستى شەشىم تامىز ايىنىڭ سوڭىنا دەيىن قابىلدانۋى ءتيىس.
سونىمەن قاتار «KEGOC» باسشىسى ەلەكتر ەنەرگياسىنىڭ تۇپكىلىكتى تاريفىندەگى كومپانيا ۇلەسى شامامەن 7 پايىز ەكەنىن اتاپ ءوتتى. سوندىقتان «KEGOC» ءتاريفىنىڭ وزگەرۋى تۇتىنۋشىلار ءۇشىن ەلەكتر ەنەرگياسىنىڭ سوڭعى قۇنىنا ايتارلىقتاي اسەر ەتپەيدى.
