مونرەال حالىقارالىق اۋەجايىندا ۇشاقتىڭ كەرى قوزعالىسى كەزىندە اۋەجاي قىزمەتكەرىن قاعىپ، ادام قازا تاپتى، دەپ حابارلايدى “ادىرنا”.
شەتەلدىك باق دەرەگىنشە، قايعىلى وقيعا 24 تامىز كۇنى كەشكە پەر ەلليوت تريۋدو اتىنداعى حالىقارالىق اۋەجايدا بولعان.
اقپاراتقا سايكەس، ۇشاق French Bee اۋە كومپانياسىنا تيەسىلى. اۋە كەمەسى مونرەالدان پاريجگە ۇشۋى ءتيىس بولعان.
الدىن الا مالىمەت بويىنشا، ۇشاق تۇراقتان كەرى قوزعالىپ جاتقان كەزدە اۋەجايدىڭ جەرۇستى قىزمەتكەرىن قاعىپ كەتكەن. وقيعا ورنىنا شامامەن ساعات 19:30-دا جەدەل جاردەم قىزمەتتەرى شاقىرىلدى.
زارداپ شەككەن قىزمەتكەر اۋرۋحاناعا جەتكىزىلدى. پوليتسيا ونىڭ جاعدايىن اۋىر ءارى ومىرىنە قاۋىپ توندىرەتىن دەپ باعالاعان. كەيىن ونىڭ العان جاراقاتتارىنان كوز جۇمعانى بەلگىلى بولدى.
مونرەال اۋەجايىن باسقاراتىن Aéroports de Montréal كومپانياسى قازا تاپقان قىزمەتكەردىڭ وتباسى مەن ارىپتەستەرىنە كوڭىل ايتتى.
«اۋەجاي قاۋىمداستىعى مۇشەسىنەن ايىرىلۋ بارشامىزعا اۋىر ءتيدى. وسى قيىن ساتتە قازا تاپقان قىزمەتكەردىڭ وتباسىنا، جاقىندارى مەن ارىپتەستەرىنە كوڭىل ايتامىز»، – دەدى كومپانيانىڭ پرەزيدەنتى ءارى باس ديرەكتورى يۆ بوشامپ.
وقيعاعا قاتىستى تەرگەۋ كانادانىڭ جۇمىسپەن قامتۋ جانە الەۋمەتتىك دامۋ مينيسترلىگىنە بەرىلدى. قازىرگى ۋاقىتتا وقيعانىڭ ناقتى سەبەپتەرى انىقتالىپ جاتىر.
