ەرلان قارين ۆيتسە-پرەزيدەنت، ياعني مەملەكەتتىك ەكىنشى ادامى بولىپ سايلاندى. بۇل تۋرالى بۇگىن، 31 تامىزدا اقوردا جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن ەرلان تىنىمبايۇلى قارين قازاقستان رەسپۋبليكاسىنىڭ ۆيتسە-پرەزيدەنتى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»،– دەلىنگەن حابارلامادا.
ەرلان قارين پرەزيدەنت اكىمشىلىگى باسشىسىنىڭ ءبىرىنشى ورىنباسارى، ونىڭ الدىندا مەملەكەتىك كەڭەسشى قىزمەتىن اتقارعان.
141 دەپۋتات ەرلان قاريننىڭ كانديداتۋراسىن قولداپ داۋىس بەرسە، 4 دەپۋتات قالىس قالعان.
ال ولجاس بەكتەنوۆ مەملەكەت باسشىسىنىڭ جارلىعىمەن قايتا پرەمەر-مينيستر لاۋازىمىنا تاعايىندالدى. قۇرىلتاي دەپۋتاتتارىنىڭ 138-ءى ولجاس بەكتەنوۆتىڭ كانديداتۋراسىن قولدادى، جەتەۋى قالىس قالدى.
پرەزيدەنت قاسىم-جومارت توقاەۆ بيىل قاڭتاردا قىزىلوردادا وتكەن ۇلتتىق قۇرىلتاي جيىنىندا مەملەكەتتىك كەڭەسشى قىزمەتى جويىلىپ، ۆيتسە-پرەزيدەنت قىزمەتى ەنگىزىلەتىنىن ايتقان بولاتىن. وسىنى ايتقاندا ەل باسشىسى سول كەزدەگى مەملەكەتتىك كەڭەسشى ەرلان قارينگە قاراتا " I’m really sorry",- دەپ قالجىڭداعان.
قازاقستاندا تاۋەلسىزدىك العان العاشقى جىلدارى ۆيتسە-پرەزيدەنت ينستيتۋتى بولعان ەدى. بۇل قىزمەت 1991 جىلى ەنگىزىلىپ، 1996 جىلى جويىلعان. سول كەزدەگى ۆيتسە-پرەزيدەنت ەرىك اسانباەۆ قىزمەتىنەن بوساتىلىپ، ينستيتۋت تولىعىمەن مەملەكەتتىك باسقارۋ جۇيەسىنەن الىنىپ تاستالعان. ەندى اراعا شامامەن 30 جىل سالىپ، بۇل لاۋازىم قايتا ورالدى.
قازاقستاننىڭ بيىل قابىلدانعان جاڭا كونستيتۋتسياسى بويىنشا ۆيتسە-پرەزيدەنت قۇرىلتايمەن، ۇكىمەتپەن جانە باسقا دا مەملەكەتتىك ورگاندارمەن ءوزارا ءىس-قيمىل جاساۋ كەزىندە پرەزيدەنت اتىنان وكىلدىك ەتەدى، سونداي-اق پرەزيدەنت ايقىندايتىن وزگە دە وكىلەتتىكتەردى جۇزەگە اسىرادى. پرەزيدەنت ءوز ەركىمەن ورنىنان تۇسۋىنە، دەنساۋلىق جاعدايىنا قاراي ءوز مىندەتتەرىن اتقارۋعا تۇراقتى قابىلەتىنىڭ بولماۋىنا نەمەسە قىزمەتىنەن كەتىرىلۋىنە بايلانىستى مەرزىمىنەن بۇرىن لاۋازىمىنان بوساتىلعان، سونداي-اق قايتىس بولعان جاعدايدا ونىڭ وكىلەتتىگى ۆيتسە-پرەزيدەنتكە وتەدى. بىراق ۆيتسە-پرەزيدەنتتىڭ دەنساۋلىق جاعدايىنا نەمەسە جەكە سيپاتتاعى وزگە دە سەبەپتەرگە بايلانىستى پرەزيدەنت وكىلەتتىگىن قابىلداۋى مۇمكىن بولماسا، پرەزيدەنت وكىلەتتىگى قۇرىلتاي توراعاسىنا وتەدى. ال پرەزيدەنت وكىلەتتىگىن قۇرىلتاي توراعاسىنىڭ قابىلداۋى مۇمكىن بولماعان كەزدە وكىلەتتىك پرەمەر-مينيسترگە جۇكتەلەدى.
