قۇرىلتايدا جۋرناليستەردىڭ دەپۋتاتتارمەن جۇمىس ىستەۋ ءتارتىبىن وزگەرتۋ جوسپارلانىپ وتىر. جاڭا فورماتقا سايكەس، بۇقارالىق اقپارات قۇرالدارىنىڭ وكىلدەرى دەپۋتاتتارعا تەك ارنايى ءباسپاسوز ورتالىعىندا سۇراق قويا الادى. بۇل تۋرالى قۇرىلتاي اپپاراتى باسشىسىنىڭ ورىنباسارى بولات كاليانبەكوۆ قۇرىلتايدىڭ ەكىنشى وتىرىسىنان كەيىن مالىمدەدى، دەپ حابارلايدى "ادىرنا".
ونىڭ ايتۋىنشا، جۋرناليستەرگە قۇرىلتاي عيماراتىنىڭ ىشىندە ءوز بەتىنشە جۇرۋگە رۇقسات بەرىلمەيدى. شەكتەۋلى اۋماققا تەك ءتيىستى ادامنىڭ سۇيەمەلدەۋىمەن كىرۋگە بولادى.
كاليانبەكوۆتىڭ سوزىنشە، دەپۋتات ءجۋرناليستىڭ سۇراعىنا جاۋاپ بەرۋگە ءوزى نيەت بىلدىرگەن جاعدايدا عانا كەزدەسۋگە شىعا الادى. سونىمەن قاتار باق وكىلدەرى دەپۋتاتتارمەن پارتيالاردىڭ ءباسپاسوز قىزمەتتەرى ارقىلى بايلانىسا الادى.
«ەگەر دەپۋتاتتىڭ نەمەسە پارتيانىڭ ءباسپاسوز قىزمەتىنىڭ بايلانىس ءنومىرى بولسا، سولار ارقىلى حابارلاسۋعا بولادى. فراكتسيا مۇشەلەرى ءجۋرناليستىڭ ساۋالىنا فراكتسيا ارقىلى جاۋاپ بەرە الادى»، – دەدى ول.
قۇرىلتاي اپپاراتى وكىلىنىڭ ايتۋىنشا، قازىرگى ۋاقىتتا جۋرناليستەردىڭ جۇمىس ىستەۋىنە قاتىستى جاڭا فورمات قاراستىرىلىپ جاتىر. سوعان سايكەس، الداعى ۋاقىتتا دەپۋتاتتارعا سۇراق قويۋ تەك ءباسپاسوز ورتالىعىندا جۇزەگە اسىرىلماق.
كاليانبەكوۆ جۋرناليستەردىڭ دەپۋتاتتارمەن جۇمىس ىستەيتىن ورنىن مەملەكەتتىك ورگاننىڭ ءوزى انىقتايتىنىن اتاپ ءوتتى. ونىڭ سوزىنشە، مۇنداي ءتارتىپ اككرەديتتەۋ ەرەجەلەرىندە قاراستىرىلعان.
«مەملەكەتتىك ورگان جۋرناليستەردىڭ دەپۋتاتتارمەن جۇمىس ىستەيتىن ورنىن ءوزى بەلگىلەيدى. اككرەديتتەۋ ەرەجەلەرى بۇعان مۇمكىندىك بەرەدى. بۇل – قۇرىلتاي دەربەس قابىلداعان مەملەكەتتىك ورگاننىڭ ەرەجەلەرى. ولار كەلىسسوز ارقىلى تالقىلانبايدى»، – دەدى ول.
جۋرناليستەر ءۇشىن دەپۋتاتتارعا تىكەلەي جۇگىنۋ مۇمكىندىگى ماڭىزدى سانالادى. بۇل ءتاسىل وزەكتى ماسەلەگە قاتىستى جەدەل تۇسىنىكتەمە الۋعا، قوسىمشا سۇراقتار قويۋعا جانە ساياساتكەرلەردىڭ ۇستانىمىن ناقتىلاۋعا مۇمكىندىك بەرەدى.
ال جۋرناليستەردىڭ دەپۋتاتتارمەن تەك ءباسپاسوز ورتالىعى ارقىلى بايلانىسۋى ءىس-شارا اياقتالعاننان كەيىن بىردەن پىكىر الۋ نەمەسە جاۋاپتى ناقتىلايتىن قوسىمشا سۇراقتار قويۋ مۇمكىندىگىن شەكتەۋى ىقتيمال.
