اقش فەدەرالدىق سوتى پرەزيدەنت دونالد ترامپتىڭ ەل اۋماعىندا دۇنيەگە كەلگەن بالالارعا اۆتوماتتى تۇردە ازاماتتىق بەرۋ قۇقىعىن شەكتەيتىن جاڭا جارلىعىنىڭ كۇشىنە ەنۋىن ۋاقىتشا توقتاتتى، دەپ حابارلايدى "ادىرنا" ءتىلشىسى Reuters-كە سىلتەپ.
مەريلەند شتاتىنىڭ فەدەرالدىق سۋدياسى دەبورا بوردمان شەشىمدى يمميگرانتتاردىڭ قۇقىقتارىن قورعاۋشى ۇيىمداردىڭ ۇجىمدىق تالاپ-ارىزى نەگىزىندە قابىلدادى.
بۇعان دەيىن اقش جوعارعى سوتى ترامپتىڭ 2025 جىلى شىعارعان وسىعان ۇقساس جارلىعىنىڭ كونستيتۋتسيانىڭ 14-تۇزەتۋىنە قايشى كەلەتىنىن انىقتاعان.
وسى شەشىمنەن كەيىن ترامپ 6 تامىزدا جاڭا جارلىققا قول قويدى. قۇجات، نەگىزىنەن، بالاسىنا اقش ازاماتتىعىن الۋ ماقساتىندا ەلگە بوسانۋ ءۇشىن كەلەتىن شەتەلدىك ازاماتتارعا قاتىستى. سونداي-اق شەتەلدىك اتا-انالاردىڭ كەيبىر ساناتتارىنا اقش اۋماعىندا تۋعان بالالارىنا ازاماتتىق بەرۋدى شەكتەۋ كوزدەلگەن. اقش جەرىندە دۇنيەگە كەلگە بالالارعا امەريكا ازاماتتىعى اۆتوماتتى تۇردە بەرىلەتىنى بەلگىلى. مۇنى "توپىراق قۇقىعى" دەپ اتايدى.
سۋديا دەبورا بوردماننىڭ پىكىرىنشە، جارلىق ۇجىمدىق تالاپقا كىرەتىن بالالارعا قاتىستى قولدانىلعان جاعدايدا كونستيتۋتسياعا قايشى بولۋى مۇمكىن. سەبەبى جوعارعى سوت بۇعان دەيىن اقش اۋماعىندا تۋعان بالالاردىڭ تۋعان ساتتەن باستاپ ازاماتتىق الۋعا قۇقىعى بار ەكەنىن انىقتاعان.
سوت شەشىمى اقش مەملەكەتتىك دەپارتامەنتىنە، ىشكى قاۋىپسىزدىك مينيسترلىگىنە جانە الەۋمەتتىك قامسىزداندىرۋ باسقارماسىنا اتالعان ساناتتاعى بالالاردىڭ ازاماتتىعىن مويىنداۋدان باس تارتۋعا تىيىم سالادى.
ال اقش ادىلەت مينيسترلىگى جاڭا جارلىقتىڭ بۇرىنعى قۇجاتقا قاراعاندا اياسى تار ەكەنىن ايتىپ، سوتتىڭ ونى توقتاتۋ تۋرالى شەشىم قابىلداۋىنا ءالى ەرتە دەگەن ءۋاج كەلتىردى. الايدا سۋديا جارلىقتىڭ ورىندالۋىن سوت تالقىلاۋى اياقتالعانعا دەيىن توقتاتۋ قاجەت دەپ تاپتى.
