شىمكەنتتە ابايدىڭ ۇلى تۇرعان ءۇيدىڭ ورنى تابىلدى

شىمكەنت قالاسىندا اباي قۇنانبايۇلىنىڭ ۇلى تۇراعۇل ابايۇلى ءومىرىنىڭ سوڭعى جىلدارى تۇرعان ءۇيدىڭ ناقتى ورنى انىقتالدى، دەپ حابارلايدى “ادىرنا” ءتىلشىسى. 

بۇل تۋرالى بەكجان بەكتانباي Facebook-تەگى جازباسىندا حابارلادى.

ونىڭ ايتۋىنشا، 1928-1934 جىلدارى شىمكەنتتەگى بۇرىنعى كرەگەر، قازىرگى مايلىقوجا كوشەسى، 24-ۇيدە تۇراعۇل ابايۇلى تۇرعان. بۇل مەكەنجاي مۇحتار اۋەزوۆتىڭ جەكە قورىندا ساقتالعان 1933 جىلعى كۇندەلىكتە كورسەتىلگەن.

كۇندەلىكتە: «گ. چيمكەنت، ۋل. كرەگەرا، 24, ماكەن مۋحامەدجانوۆوي» دەگەن جازبا بار. ماكەن مۇحامەدجانوۆا — تۇراعۇل ابايۇلىنىڭ قىزى. بۇعان دەيىن ابايتانۋشى ماماندار تۇراعۇلدىڭ كامپەسكە كەزەڭىنەن كەيىن شىمكەنتكە جەر اۋدارىلىپ، قىزى ماكەن مەن كۇيەۋ بالاسى ۇلىقبەك مۇحامەدجانوۆتىڭ ۇيىندە تۇرعانىن جانە سول جەردە قايتىس بولعانىن بىلگەن.

بەكجان بەكتانبايدىڭ جازۋىنشا، 1933 جىلدىڭ باسىندا مۇحتار اۋەزوۆ قۇپيا تۇردە شىمكەنتكە كەلىپ، تۇراعۇلدىڭ ۇيىنە بارعان. سول جىلدىڭ كوكتەمى مەن كۇزىندە جازۋشى جۋالى، تۇلكىباس جانە سايرام وڭىرلەرىن ارالاپ، بىرقاتار وچەرك جازعان.

زەرتتەۋشى قازىرگى تاڭدا بۇرىنعى 24-ءۇيدىڭ ورنىنىڭ دا انىقتالعانىن اتاپ ءوتتى. ونىڭ سول جاعىندا مۋزىكا مەكتەبى، ال وڭ جاعىندا ەكى قاباتتى جەكەجاي ورنالاسقان. 20 جانە 26/1 ۇيلەرىنىڭ اراسىنداعى 22 جانە 24-ءۇي ەكەنىن كورسەتەتىن تاقتاشالار الىنىپ تاستالعان.

«بىراق بۇل ابايداي تۇلپار اقىن تۇياعى تۇراعۇلدىڭ ناقتى تۇرعان ءۇي ورنىن انىقتاۋعا بوگەت بولعان جوق»، — دەپ جازدى بەكجان بەكتانباي.

زەرتتەۋشى وسى مەكەنجايعا تۇراعۇل ابايۇلى مەن ونىڭ اۋلەتىنە ارنالعان ەسكەرتكىش تاقتا ورناتۋ قاجەت دەپ سانايدى.

ايتا كەتەيىك، اباي قۇنانبايۇلىنىڭ ايگەرىمنەن تۋعان ۇلى تۇراعۇل 1875 جىلى دۇنيەگە كەلگەن. ول 1909 جىلى كاكىتاي ىسقاقۇلىمەن بىرگە ابايدىڭ تۇڭعىش ولەڭدەر جيناعىن شىعارۋعا اتسالىسقان. سونداي-اق، تۇراعۇل ابايۇلى الاشوردا مۇشەسى بولعان.

تۇراعۇل اكەسىنىڭ شىعارماشىلىق ساتتەرىن ەستەلىككە قالدىرىپ، ابايدىڭ ولەڭ جازۋ بارىسىن ەگجەي-تەگجەيلى سيپاتتاعان.

1916 جىلى مايداننىڭ قارا جۇمىسىنا الىنعان قازاق جىگىتتەرىنە ءتىلماش رەتىندە قىزمەت ەتكەن. تۇراعۇل ابايۇلى 1934 جىلعى 6 ناۋرىزدا 59 جاسىندا شىمكەنتتە قايتىس بولدى.

عالىم ورىناي جۇباەۆانىڭ دەرەگىنشە، تۇراعۇلدىڭ سۇيەگى شىمكەنتتەگى مۇسىلمان زيراتىنا جەرلەنگەن. كەيىن ونىڭ ورنىنا حيميالىق زاۋىت سالىنىپ، زيرات زاۋىت استىندا قالعان.