قازاقستاننىڭ ەڭبەك سىڭىرگەن قايراتكەرى بايان الاگوزوۆا امان تاسىعاننىڭ Talk Like باعدارلاماسىنا بەرگەن سۇحباتىندا بايان ماقساتقىزى اكەسىمەن بولعان قارىم-قاتىناسى جايىندا تولعانا ايتتى. ونىڭ سوزىنشە، اكەسى وتباسىندا ەرەكشە بەدەلگە يە بولعان. ۇيدەگى ءاربىر ادام ونىڭ ءسوزىن زاڭداي قابىلداپ، الدىنان كەسە-كولدەنەڭ وتپەگەن.
«اكەمىز ءبىز ءۇشىن داۋسىز بەدەل ەدى. ول كىسى ءبىر نارسە ايتسا، ەشكىم قارسى پىكىر بىلدىرمەيتىن. اكەمنىڭ ءسوزى وتباسىمىزدىڭ زاڭى سەكىلدى بولاتىن»، – دەدى ول.
بايان ماقساتقىزى اكەسىن قاتال ادام بولدى دەپ ەسەپتەمەيدى. كەرىسىنشە، ونى وتە جىلى ءارى مەيىرىمدى جان رەتىندە ەسكە الادى. الايدا وتباسىنداعى تاربيەگە بايلانىستى بالالارى اكەسىنە ەركەلەپ، قۇشاقتاپ نەمەسە سەزىمىن اشىق بىلدىرە بەرمەگەن.
ونىڭ ايتۋىنشا، اكەسىنىڭ ماڭدايىنان ءسۇيىپ، «قىزىم» دەپ اتاۋىنىڭ ءوزى ەرەكشە ىقىلاس پەن مەيىرىمنىڭ بەلگىسى بولعان.
«اكەم مەنى تىزەسىنە وتىرعىزىپ، قۇشاقتاي بەرمەيتىن. بىراق ماڭدايىمنان ءسۇيىپ، «قىزىم» دەگەنىنىڭ ءوزى مەن ءۇشىن ۇلكەن جىلۋلىق ەدى. قازىر وتكەندى قايتارۋعا مۇمكىندىك بولسا، كىشكەنتاي قىزعا اينالىپ، اكەمنىڭ تىزەسىنە وتىرىپ، يىعىنا باسىمدى قويىپ، ۇزاق قۇشاقتاپ وتىرار ەدىم»، – دەدى بايان ماقساتقىزى.
ول بالا كۇنىنەن قالىپتاسقان ادەتتەردىڭ كەيبىرى ءالى كۇنگە دەيىن ومىرىندە ساقتالعانىن دا جاسىرمادى. ماسەلەن، وتباسى داستارقانعا وتىرعاندا ەر ادامنىڭ ءبىرىنشى اس الۋىن كۇتۋ ادەتى اكەسىنىڭ ۇيىندەگى تاربيەدەن قالعان.
سونىمەن قاتار بايان ماقساتقىزى بۇگىنگى تاڭدا بالا مەن اكە اراسىندا تەك سىيلاستىق قانا ەمەس، اشىق اڭگىمە دە بولۋى كەرەك دەپ سانايدى. سول سەبەپتى ول ءوز بالالارىنا اكەسىمەن ەركىن سويلەسىپ، ويىن، قالاۋىن جانە كەلىسپەيتىن تۇستارىن جاسىرماي ايتۋعا مۇمكىندىك بەرۋگە تىرىساتىنىن جەتكىزدى.
ونىڭ پايىمىنشا، اكەگە دەگەن قۇرمەت قورقىنىشقا نەمەسە اراداعى الشاقتىققا اينالماۋى كەرەك. بالا اكەسىن سىيلاي وتىرىپ، وعان ءوز سەزىمىن اشىق بىلدىرە الۋى ماڭىزدى.
