Qazaqstannyŋ eŋbek sıŋırgen qairatkerı Baian Alagözova Aman Tasyǧannyŋ Talk Like baǧdarlamasyna bergen sūhbatynda Baian Maqsatqyzy äkesımen bolǧan qarym-qatynasy jaiynda tolǧana aitty. Onyŋ sözınşe, äkesı otbasynda erekşe bedelge ie bolǧan. Üidegı ärbır adam onyŋ sözın zaŋdai qabyldap, aldynan kese-köldeneŋ ötpegen.
«Äkemız bız üşın dausyz bedel edı. Ol kısı bır närse aitsa, eşkım qarsy pıkır bıldırmeitın. Äkemnıŋ sözı otbasymyzdyŋ zaŋy sekıldı bolatyn», – dedı ol.
Baian Maqsatqyzy äkesın qatal adam boldy dep eseptemeidı. Kerısınşe, ony öte jyly ärı meiırımdı jan retınde eske alady. Alaida otbasyndaǧy tärbiege bailanysty balalary äkesıne erkelep, qūşaqtap nemese sezımın aşyq bıldıre bermegen.
Onyŋ aituynşa, äkesınıŋ maŋdaiynan süiıp, «qyzym» dep atauynyŋ özı erekşe yqylas pen meiırımnıŋ belgısı bolǧan.
«Äkem menı tızesıne otyrǧyzyp, qūşaqtai bermeitın. Bıraq maŋdaiymnan süiıp, «qyzym» degenınıŋ özı men üşın ülken jylulyq edı. Qazır ötkendı qaitaruǧa mümkındık bolsa, kışkentai qyzǧa ainalyp, äkemnıŋ tızesıne otyryp, iyǧyna basymdy qoiyp, ūzaq qūşaqtap otyrar edım», – dedı Baian Maqsatqyzy.
Ol bala künınen qalyptasqan ädetterdıŋ keibırı älı künge deiın ömırınde saqtalǧanyn da jasyrmady. Mäselen, otbasy dastarqanǧa otyrǧanda er adamnyŋ bırınşı as aluyn kütu ädetı äkesınıŋ üiındegı tärbieden qalǧan.
Sonymen qatar Baian Maqsatqyzy bügıngı taŋda bala men äke arasynda tek syilastyq qana emes, aşyq äŋgıme de boluy kerek dep sanaidy. Sol sebeptı ol öz balalaryna äkesımen erkın söilesıp, oiyn, qalauyn jäne kelıspeitın tūstaryn jasyrmai aituǧa mümkındık beruge tyrysatynyn jetkızdı.
Onyŋ paiymynşa, äkege degen qūrmet qorqynyşqa nemese aradaǧy alşaqtyqqa ainalmauy kerek. Bala äkesın syilai otyryp, oǧan öz sezımın aşyq bıldıre aluy maŋyzdy.
