اقش پرەزيدەنتى دونالد ترامپ التىن ءتۇستى شاشىن وزگەرتىپ، جاڭا بەينەسىن كوپشىلىككە كورسەتتى. دەمالىس كۇندەرىن وتكىزۋ ءۇشىن بەدمينستەردەگى گولف-كلۋبىنا بارعان كەزدە ونىڭ جاڭا كەلبەتى جۇرت نازارىنا ىلىكتى، دەپ حابارلايدى «ادىرنا» ءتىلشىسى New York Post-قا سىلتەمە جاساپ.
كوپ جىلدان بەرى التىن ءتۇستى شاش ۇلگىسىمەن تانىلعان دونالد ترامپ بۇل جولى جۇرت الدىنا قوڭىر ءتۇستى شاشپەن شىقتى. ونىڭ شاشى سارعىلت رەڭككە بويالعانى بايقالدى.
امەريكا پرەزيدەنتىنىڭ سىرت كەلبەتىندەگى بۇل وزگەرىس الەۋمەتتىك جەلى قولدانۋشىلارى اراسىندا قىزۋ تالقىلاندى. جازۋشى ەنن لاموتت ترامپتىڭ جاڭا وبرازىن ۇناتقانىن ايتتى.
«وتە جاس كورىنەدى. ءتىپتى پيرس بروسنانعا قاتتى ۇقسايدى»،– دەپ پىكىر ءبىلدىردى ول.
الەۋمەتتىك جەلى قولدانۋشىلارى ازىلدەپ، ترامپتىڭ ماۋسىم اۋىسۋىنا بايلانىستى شاش ۇلگىسىن وزگەرتۋگە شەشىم قابىلداعانىن جازدى.
«جاز اياقتالدى، دەمەك اققۇبادان قاراتورى تۇسكە اۋىساتىن تابيعي ۋاقىت كەلدى»،–دەدى ولار.
كەلەسى كۇنى دونالد ترامپ Fox News جۇرگىزۋشىسى برەت بايەرمەن بىرگە گولف وينادى. الايدا بۇل جولى پرەزيدەنت شاشىن «ترامپ بارلىق ماسەلەدە دۇرىس بولدى» دەگەن جازۋى بار باس كيىممەن جاۋىپ قويعان.
دونالد ترامپ ءوز ءيميدجىن سيرەك وزگەرتەدى. دەگەنمەن، 2019 جىلى ول ۆيردجينيا شتاتىنداعى شىركەۋ قىزمەتىنە شاشىن ارتقا قايىرىپ بارعان ەدى. سول كەزدە ونىڭ شاش ۇلگىسى كاليفورنيا شتاتىنىڭ دەموكرات گۋبەرناتورى گەۆين نيۋسومنىڭ ستيلىنە ۇقساتىپ باعالانعان. الايدا بۇل وزگەرىس ۇزاققا سوزىلمادى. سول كۇنى-اق ترامپ ءوزىنىڭ ۇيرەنشىكتى شاش ۇلگىسىنە قايتا ورالعان.
ترامپتىڭ شاش ۇلگىسى ونىڭ پرەزيدەنت بولعانىنا دەيىن-اق قوعامدا قىزۋ تالقىلاناتىن تاقىرىپتاردىڭ بىرىنە اينالعان ەدى. كوپ جىلدار بويى ونىڭ شاشىنا قاتىستى ءتۇرلى قاۋەسەتتەر تارادى. بىرەۋلەر ونى پاريك كيەدى دەسە، ەندى بىرەۋلەر كاسىپكەردىڭ شاشىن ترانسپلانتاتسيا ارقىلى قالپىنا كەلتىرگەنىن ايتقان. بۇل ماسەلە ءتىپتى ترامپتىڭ العاشقى جۇبايى يۆانا ترامپپەن اجىراسۋ پروتسەسىنە قاتىستى ماتەريالداردا دا كوتەرىلگەن.
