وڭتۇستىك كورەيا پرەزيدەنتى لي چجە ميون 16 قىركۇيەكتە سەۋلدە قازاقستان، قىرعىزستان، تاجىكستان، تۇرىكمەنستان جانە وزبەكستان باسشىلارىنىڭ قاتىسۋىمەن العاشقى سامميت وتكىزەدى، دەپ حابارلايدى "ادىرنا".
Reuters دەرەگىنشە، جالپى سامميتكە دەيىن لي چجە ميون ورتالىق ازيا مەملەكەتتەرىنىڭ باسشىلارىمەن جەكە كەلىسسوزدەر جۇرگىزەدى. ەكىجاقتى كەزدەسۋلەر 14–16 قىركۇيەك ارالىعىندا وتەدى.
كەزدەسۋدىڭ نەگىزگى تاقىرىپتارى ساۋدا مەن ينۆەستيتسيا كولەمىن ارتتىرۋ، ەنەرگەتيكا سالاسىنداعى ىنتىماقتاستىقتى كەڭەيتۋ، ستراتەگيالىق ماڭىزى بار پايدالى قازبالار جانە جەتكىزۋ تىزبەگىن دامىتۋ ماسەلەلەرىنە ارنالادى.
وڭتۇستىك كورەيا پرەزيدەنتىنىڭ ايتۋىنشا، سامميت سەۋل مەن ورتالىق ازيا ەلدەرى اراسىنداعى قارىم-قاتىناستى مەملەكەت باسشىلارى دەڭگەيىندەگى كوپجاقتى ىنتىماقتاستىق فورماتىنا شىعارۋعا باعىتتالعان.
سامميتكە دايىندىق بىرنەشە اي بۇرىن باستالعان. ءساۋىر ايىندا سەۋلدە وڭتۇستىك كورەيا مەن ورتالىق ازيانىڭ بەس مەملەكەتىنىڭ جوعارى لاۋازىمدى وكىلدەرىنىڭ العاشقى كەزدەسۋى ءوتتى. ال ماۋسىمدا تاشكەنتتە تاراپتاردىڭ ەكىنشى كەزدەسۋى ۇيىمداستىرىلدى. كەزدەسۋلەر بارىسىندا ءسامميتتىڭ ناقتى ناتيجەلەرى مەن ىنتىماقتاستىقتى دامىتۋدىڭ ءتورت باعىتى تالقىلاندى. ولار – ارىپتەستىكتى ينستيتۋتسيونالداندىرۋ، بەيبىتشىلىك پەن تۇراقتىلىق، يننوۆاتسيا مەن وركەندەۋ، سونداي-اق گۋمانيتارلىق بايلانىستار.
وڭتۇستىك كورەيا مەن ورتالىق ازيا ەلدەرىنىڭ كوپجاقتى ىنتىماقتاستىعى 2007 جىلدان بەرى جالعاسىپ كەلەدى. سول جىلى وڭتۇستىك كورەيا ۇكىمەتىنىڭ باستاماسىمەن «كورەيا رەسپۋبليكاسى – ورتالىق ازيا» ىنتىماقتاستىق فورۋمى قۇرىلعان. جىل سايىن وتەتىن فورۋمعا قازاقستان، قىرعىزستان، تاجىكستان، تۇرىكمەنستان جانە وزبەكستان قاتىسادى. پلاتفورما اياسىندا ەكونوميكا، گۋمانيتارلىق سالا جانە بيزنەس باعىتتارىنداعى بىرلەسكەن جوبالار تالقىلانادى.
بۇعان دەيىن فورۋم مينيسترلەر دەڭگەيىنە كوتەرىلگەن. ال 16 قىركۇيەكتەگى كەزدەسۋ بۇل ىنتىماقتاستىق فورماتىنىڭ العاش رەت مەملەكەت باسشىلارى دەڭگەيىندە وتۋىمەن ەرەكشەلەنەدى.
