قازاقستان پرەزيدەنتى قاسىم-جومارت توقاەۆ نيۋ-دەليدە ءوتىپ جاتقان بريكس-ءتىڭ پلەنارلىق وتىرىسىندا ءسوز سويلەدى. بۇل تۋرالى اقوردا جاريالادى، دەپ حابارلايدى “ادىرنا”.
مەملەكەت باسشىسى بريكس-ءتىڭ الەمدىك ەكونوميكاداعى رولىنە توقتالدى. ونىڭ ايتۋىنشا، ۇيىمعا مۇشە جانە سەرىكتەس ەلدەر جاھان حالقىنىڭ شامامەن جارتىسىن قۇرايدى، ال ولاردىڭ ۇلەسىنە الەمدىك جالپى ىشكى ءونىمنىڭ 40 پايىزى تيەسىلى.
"دەگەنمەن حالىقارالىق قوعامداستىق الدىندا تۇرعان ىرگەلى ماسەلەلەردىڭ شەشىمىن تاۋىپ، جەتەكشى دەرجاۆالار اراسىنداعى سەنىم دەڭگەيىن قالپىنا كەلتىرمەيىنشە، بريكس الەۋەتىن تولىق ىسكە اسىرۋ مۇمكىن ەمەس. بۇل ءۇردىس 2026 جىلى جاريالانعان جاھاندىق بەيبىتشىلىك يندەكسىندە ايقىن كورىنىس تاپتى. گەوساياسي قاقتىعىستار ۋشىعىپ، ميليتاريزاتسيا كۇشەيگەن، كوپجاقتى ينستيتۋتتار السىرەپ، ساۋدا كەدەرگىلەرى كوبەيگەن كەزەڭدى سيپاتتايتىن "جاپپاي جىككە ءبولىنۋ" دەگەن ۇعىم پايدا بولدى", - دەدى پرەزيدەنت.
پرەزيدەنتتىڭ ايتۋىنشا، بىلتىر الەم ەكونوميكاسى قاقتىعىستار سالدارىنان شامامەن 22 تريلليون دوللار شىعىنعا ۇشىراعان. بۇل جاھاندىق جالپى ىشكى ءونىمنىڭ شامامەن 10 پايىزىنا تەڭ.
"ياعني الەمدىك ىشكى جالپى ءونىمنىڭ 10 پايىزىنا پاراپار. بۇل - الاڭداتارلىق احۋال. ءبىز ايماقتىق كيكىلجىڭدەردىڭ قاقتىعىسۋشى تاراپتارمەن شەكتەلمەي، حالىقارالىق ەكونوميكاعا زاردابىن تيگىزە باستاعانىنا كۋا بولىپ وتىرمىز. ماڭىزدى تەڭىز جولدارىنىڭ ءۇزىلۋى جاھاندىق ەنەرگەتيكا، ازىق-تۇلىك جانە ساۋدا تىزبەگىندەگى وسال تۇستاردى انىق كورسەتتى", - دەپ اتاپ ءوتتى مەملەكەت باسشىسى.
