اقش عارىش وربيتاسىنا شابۋىل ماقساتىندا قولدانىلاتىن قارۋ ورنالاستىرعانىن العاش رەت رەسمي تۇردە مويىندادى، دەپ حابارلايدى "ادىرنا" ءتىلشىسى.
بۇل تۋرالى اقش اۋە كۇشتەرىنىڭ ءمينيسترى تروي مەينك راستادى.
ول دۇيسەنبى كۇنى اۋە، عارىش جانە كيبەرسوعىس جونىندەگى كونفەرەنتسيادا ءسوز سويلەپ، اتالعان قارۋدىڭ امەريكالىق اسكەريلەردى «وزگەرىپ جاتقان قاۋىپتەردەن» قورعاۋ ءۇشىن قاجەت ەكەنىن ايتتى.
مينيستر قارۋدىڭ ناقتى مۇمكىندىكتەرىن اشىپ ايتپادى. سونداي-اق ونىڭ وربيتاعا قاشان شىعارىلعانىن ناقتىلامادى.
بۇعان دەيىن اقش رەسمي وكىلدەرى عارىشتاعى اسكەري مۇمكىندىكتەردى كۇشەيتۋ جوسپارى تۋرالى عانا مالىمدەپ كەلگەن. ۆاشينگتون بۇعان رەسەي مەن قىتايدىڭ امەريكالىق جەرسەرىكتەردىڭ جۇمىسىن بۇزۋعا نەمەسە ولارعا شابۋىل جاساۋعا باعىتتالعان باعدارلامالارىن سەبەپ رەتىندە اتاعان.
بۇدان بولەك، دونالد ترامپ اكىمشىلىگى زىمىراندار مەن اقش اۋماعىنا تونەتىن باسقا دا قاۋىپتەردى عارىشتان ۇستاپ قالۋعا ارنالعان «التىن كۇمبەز» جۇيەسىنىڭ قۇرامىندا عارىشتىق كومپونەنت، سونىڭ ىشىندە توسقاۋىلداۋشى زىمىراندار بولاتىنىن حابارلاعان.
1967 جىلى كسرو مەن اقش عارىشتا جاپپاي قىرىپ-جوياتىن قارۋدى ورنالاستىرۋعا تىيىم سالاتىن عارىش كەڭىستىگى تۋرالى شارتقا قول قويعان. الايدا قۇجات كادىمگى قارۋ تۇرلەرىنە قاتىستى شەكتەۋ قويمايدى.
سوڭعى جىلدارى رەسەي، قىتاي جانە اقش قارسى تاراپتىڭ بايلانىس، بارلاۋ جانە ناۆيگاتسيا ءۇشىن پايدالانىلاتىن جەرسەرىكتەرىنە شابۋىل جاساۋعا مۇمكىندىك بەرەتىن ءتۇرلى قۇرالداردى دامىتىپ كەلەدى.
2019 جىلى اقش-تا 70 جىلعا جۋىق ۋاقىتتان كەيىن قارۋلى كۇشتەردىڭ جاڭا ءتۇرى — عارىش كۇشتەرى قۇرىلدى. وتكەن جىلى دونالد ترامپ عارىش كۇشتەرىنە قورعانىسپەن قاتار شابۋىلداۋ مىندەتتەرىن دە جۇكتەيتىن جارلىق شىعاردى.
اقش عارىش كۇشتەرىنىڭ وكىلى بۇل ماقساتتا «كينەتيكالىق جانە كينەتيكالىق ەمەس قۇرالدار» بار ەكەنىن ايتتى.
