پرەزيدەنت قاسىم-جومارت توقاەۆتىڭ تاپسىرماسىمەن مادەنيەت جانە اقپارات ءمينيسترى ارمان قىرىقباەۆ تەدجون قالاسىنداعى مەموريالدىق كەشەنگە بارىپ، سوندا جەرلەنگەن كورنەكتى كورەي قولباسشىسى، گەنەرال حون بوم دونىڭ رۋحىنا تاعزىم ەتتى، دەپ حابارلايدى «ادىرنا» ءتىلشىسى.
ايتا كەتەيىك، مينيستر كورەيا رەسپۋبليكاسىنا مەملەكەتتىك ساپارمەن بارعان مەملەكەت باسشىسى باستاعان رەسمي دەلەگاتسيا قۇرامىندا.
كەشەندە قۇرمەت قاراۋىلىنىڭ قاتىسۋىمەن ارنايى ءراسىم ءوتتى. ارمان قىرىقباەۆ ەل تاۋەلسىزدىگى جولىندا كۇرەسىپ، وتانىن قورعاۋعا عۇمىرىن ارناعان جاندارعا قۇرمەت ءبىلدىرىپ، مەموريالعا گۇل شوعىن قويدى. سونداي-اق گەنەرال حون بوم دونىڭ رۋحىنا تاعزىم ەتتى.
تەدجونداعى بۇل مەموريالدىق كەشەن كورەيا رەسپۋبليكاسىنداعى اسا ماڭىزدى تاعزىم ورىندارىنىڭ ءبىرى سانالادى. مۇندا ەلگە ايرىقشا ەڭبەك سىڭىرگەن 150 مىڭعا جۋىق ادام ماڭگىلىك تىنىس تاپقان. گەنەرال حون بوم دونىڭ ەسىمى قازاقستان مەن كورەيانى بايلانىستىراتىن ورتاق تاريحتا ايرىقشا ورىن الادى. ول ءومىرىنىڭ سوڭعى جىلدارىن قازاقستاندا وتكىزىپ، قىزىلوردادا جەرلەنگەن ەدى. 2021 جىلى قازاقستاننىڭ قولداۋىمەن ونىڭ سۇيەگى اتامەكەنىنە جەتكىزىلىپ، تەدجوندا قايتا جەرلەندى.
بيىل گەنەرال حون بوم دونىڭ سۇيەگى قىزىلوردادان كورەيا رەسپۋبليكاسىنا جەتكىزىلگەنىنە بەس جىل تولادى. ونىڭ تاعدىر جولى ەكى حالىقتى ءوزارا جاقىنداستىرعان ورتاق تاريحتىڭ تاعىلىمدى ءبىر بەلەسىنە اينالدى.
ساپار سوڭىندا ارمان قىرىقباەۆ قۇرمەتتى قوناقتار كىتابىنا ەستەلىك جازبا قالدىردى. مەموريالدىق كەشەندەگى بۇل ءراسىم ەكى ەلدىڭ تاريحي مۇراسىنا دەگەن قۇرمەتتى ايعاقتاپ، قازاقستان مەن كورەيا اراسىنداعى بايلانىستى ودان ءارى نىعايتۋدىڭ ماڭىزىن كورسەتتى.
