گرەكيا پارلامەنتى بۇرىنعى ەۋروكوميسسار جانە قازىرگى دەپۋتات ديميتريس اۆراموپۋلوستىڭ دەپۋتاتتىق يممۋنيتەتىن الىپ تاستاۋعا داۋىس بەردى. بۇل شەشىم بەلگيادا تەرگەلىپ جاتقان «قاتارگەيت» ءىسى اياسىنداعى تەرگەۋ ارەكەتتەرىن جالعاستىرۋعا مۇمكىندىك بەرەدى، دەپ حابارلايدى "ادىرنا".
پارلامەنت وتىرىسىنا قاتىسقان 266 دەپۋتاتتىڭ 264-ءى شەشىمدى قولدادى. بۇعان دەيىن پارلامەنتتىڭ ەتيكا جونىندەگى كوميتەتى دە يممۋنيتەتتى الىپ تاستاۋدى ءبىراۋىزدان ۇسىنعان.
73 جاستاعى اۆراموپۋلوس — «جاڭا دەموكراتيا» پارتياسىنىڭ دەپۋتاتى. ول 2014-2019 جىلدارى ەۋروپالىق كوميسسيانىڭ كوشى-قون ماسەلەلەرى جونىندەگى كوميسسارى قىزمەتىن اتقارعان. بۇعان دەيىن افينا قالاسىنىڭ مەرى بولعان.
بەلگياداعى تەرگەۋ ونىڭ Fight Impunity ۇيىمىمەن بايلانىسىنا قاتىستى. ۇيىمدى «قاتارگەيت» ىسىندەگى نەگىزگى كۇدىكتىلەردىڭ ءبىرى، يتاليانىڭ بۇرىنعى ەۋروپارلامەنت دەپۋتاتى انتونيو پانتسەري قۇرعان.
اۆراموپۋلوس وزىنە تاعىلعان زاڭ بۇزۋشىلىقتار تۋرالى ايىپتاردى جوققا شىعاردى. ول Fight Impunity ۇيىمىمەن ىنتىماقتاستىعى زاڭدى بولعانىن جانە العان گونورارلارىن سالىق ورگاندارىنا دەكلاراتسيالاعانىن مالىمدەدى. سونداي-اق يممۋنيتەتىن الىپ تاستاۋدى ءوزى سۇراپ، تەرگەۋ ورگاندارىمەن تولىق ىنتىماقتاستىققا دايىن ەكەنىن ايتتى.
گرەكيا بيلىگىنىڭ قۇجاتىندا بەلگيا سوتىنىڭ اۆراموپۋلوسقا قاتىستى قاماۋعا الۋ وردەرى قىلمىستىق ۇيىمعا قاتىسۋ، سىبايلاس جەمقورلىق جانە زاڭسىز جولمەن الىنعان كىرىستەردى جىلىستاتۋ تۋرالى كۇدىكتەرمەن بايلانىستى ەكەنى كورسەتىلگەن. بۇل ايىپتار بويىنشا كىنالى ەكەنى سوتتا دالەلدەنگەن جوق، تەرگەۋ جالعاسىپ جاتىر.
«قاتارگەيت» قالاي باستالدى؟
بەلگياداعى تەرگەۋ 2022 جىلعى جەلتوقساندا باستالعان. بيلىك كەيبىر شەتەلدىك مەملەكەتتەر ەۋروپارلامەنت شەشىمدەرىنە اقشا مەن سىيلىقتار ارقىلى ىقپال ەتۋگە تىرىستى دەگەن كۇدىكپەن بىرقاتار ءتىنتۋ جۇرگىزدى.
وپەراتسيالار بارىسىندا شامامەن 1,5 ملن ەۋرو قولما-قول اقشا تاركىلەنىپ، بىرنەشە ادام قاماۋعا الىندى. ولاردىڭ قاتارىندا انتونيو پانتسەري مەن سول كەزدەگى ەۋروپارلامەنت ۆيتسە-پرەزيدەنتى ەۆا كايلي بولدى.
ءىس بويىنشا سوت پروتسەستەرى مەن بىرقاتار پروتسەسسۋالدىق ارەكەتتەرگە قاتىستى شاعىمدار تەرگەۋدىڭ سوزىلۋىنا سەبەپ بولدى.
اۆراموپۋلوستىڭ يممۋنيتەتىنىڭ الىنۋى بەلگيا بيلىگىنە ونىڭ ءىس بويىنشا ىقتيمال بايلانىستارى مەن ارەكەتتەرىن ءارى قاراي تەكسەرۋگە مۇمكىندىك بەرەدى. تەرگەۋدىڭ قورىتىندىسى مەن اۆراموپۋلوسقا قاتىستى تۇپكىلىكتى قۇقىقتىق شەشىم ازىرگە بەلگىسىز.
