الماتىدا كوممۋنالدىق اقىلى تۇراقتاردىڭ تاريفتەرىن وزگەرتۋ ۇسىنىلدى. جاڭا جۇيە بويىنشا تۇراق اقىسى بارلىق اۋماقتا بىردەي 100 تەڭگە ەمەس، كولىك جۇكتەمەسىنە قاراي ساعاتىنا 100, 150 جانە 200 تەڭگە بولىپ بەلگىلەنۋى مۇمكىن. بۇل تۋرالى الماتى ءماسليحاتىنىڭ سەسسياسىندا الماتى قالاسىنىڭ جول قوزعالىسىن ۇيىمداستىرۋ جانە جولاۋشىلار كولىگى باسقارماسىنىڭ باسشىسى ەرجان ديحانباەۆ ايتتى، دەپ حابارلايدى “ادىرنا”.
ونىڭ ايتۋىنشا، قولدانىستاعى بىرىڭعاي تاريف 2016 جىلدان بەرى وزگەرمەگەن. وسى ۋاقىت ارالىعىندا الماتىداعى كولىك سانى ءبىر ميلليوننان اسىپ، جولدار مەن تۇراق ورىندارىنا تۇسەتىن جۇكتەمە ارتقان. اسىرەسە قالانىڭ ورتالىق بولىگىندە تۇراق ورىندارىنا سۇرانىس جوعارى.
ۇسىنىلىپ وتىرعان جاڭا تاريفتىك جۇيە ەكى نەگىزگى كورسەتكىشكە نەگىزدەلەدى: اۋماقتاعى كولىك جۇكتەمەسى جانە ونىڭ فۋنكتسيونالدىق ماقساتى.
كولىك قوزعالىسى سالىستىرمالى تۇردە تومەن ۋچاسكەلەردە تۇراق قۇنى ساعاتىنا 100 تەڭگە بولىپ قالادى. ورتاشا جۇكتەمەسى بار اۋماقتاردا تاريف 150 تەڭگە، ال تۇراق ورىندارى تاپشى ءارى سۇرانىس جوعارى ۋچاسكەلەردە 200 تەڭگەگە دەيىن بەلگىلەنۋى جوسپارلانىپ وتىر.
ديحانباەۆتىڭ ايتۋىنشا، جوعارى سۇرانىسقا يە اۋماقتارداعى ءتاريفتىڭ ءوسۋى كولىك جۇرگىزۋشىلەرىن تۇراقتا ۇزاق ۋاقىت تۇرماۋعا ىنتالاندىرىپ، ورىنداردىڭ اۋىسىمدىلىعىن ارتتىرۋعا مۇمكىندىك بەرەدى. بۇل ءوز كەزەگىندە قىسقا مەرزىمگە كولىك قويۋ ءۇشىن بوس ورىنداردىڭ قولجەتىمدىلىگىن جاقسارتۋعا باعىتتالعان.
اقىلى تۇراق ايماعىندا ورنالاسقان ۇيلەردىڭ تۇرعىندارى ءۇشىن قولدانىستاعى جەڭىلدىكتەردى ساقتاۋ جوسپارلانىپ وتىر.
اكىمدىك مالىمەتىنشە، تۇرعىن ءۇي يەلەرى ارنايى رۇقسات راسىمدەۋ ارقىلى تۇرعىلىقتى جەرىنە جاقىن ورنالاسقان بەلگىلەنگەن تۇراق ورىندارىن تەگىن پايدالانا الادى. سونىمەن قاتار پايدالانۋشىلاردىڭ باسقا دا جەڭىلدىك ساناتتارى ساقتالادى.
جاڭا تاريفتىك جۇيەنىڭ نەگىزگى ماقساتى – تۇراق ورىندارىنىڭ اينالىمىن ارتتىرىپ، قىسقا مەرزىمگە كولىك قوياتىن جۇرگىزۋشىلەر ءۇشىن بوس ورىنداردىڭ بولۋىن قامتاماسىز ەتۋ.
ازىرلەۋشىلەردىڭ پىكىرىنشە، سارالانعان تاريفتەر كولىك كوپ شوعىرلاناتىن كوشەلەردە كولىكتىڭ توقتاپ تۇرۋ ۋاقىتىن قىسقارتۋعا، ەكىنشى قاتارعا كولىك قويۋ جاعدايلارىن ازايتۋعا جانە بوس تۇراق ىزدەۋگە كەتەتىن ۋاقىتتى قىسقارتۋعا ىقپال ەتۋى مۇمكىن.
سونداي-اق بۇل شارا الماتىنىڭ ورتالىق بولىگىندەگى كولىك جۇكتەمەسىن ازايتىپ، جول قوزعالىسىنا قاتىسۋشىلاردىڭ ءجۇرىپ-تۇرۋ جاعدايىن جاقسارتۋعا باعىتتالعان.
