پاۆلودار قالاسىنىڭ مەملەكەتتىك رامىزدەر الاڭىندا ىشكى ىستەر مينيسترلىگىنىڭ ۇلتتىق ۇلانى قاتارىنا شاقىرىلۋشىلاردى سالتاناتتى تۇردە شىعارىپ سالۋ ءراسىمى ءوتتى.
پاۆلودار وبلىسى – «ادال ازامات – سارباز – وتان قورعاۋشى» جوباسى اياسىندا قورعانىس مينيسترلىگى جۇزەگە اسىرىپ جاتقان «سارباز جولى» ءداستۇرىن قولداعان ءۇشىنشى ءوڭىر.
ءىس-شاراعا پاۆلودار وبلىسىنىڭ اكىمى اسايىن بايحانوۆ، قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور اسقار مۇستابەكوۆ، قورعانىس ىستەرى دەپارتامەنتىنىڭ وكىلدەرى، اسكەري-تەحنيكالىق مەكتەپتىڭ كۋرسانتتارى، قارۋلى كۇشتەردىڭ ارداگەرلەرى، سونداي-اق اسكەرگە شاقىرىلۋشىلاردىڭ تۋعان-تۋىستارى قاتىستى.
ءوڭىر باسشىسى اسايىن بايحانوۆ جاستارعا اقجولتاي تىلەگىن ءبىلدىردى. ول اسكەري قىزمەتتىڭ تۇلعا قالىپتاستىرۋداعى، جاۋاپكەرشىلىك، ءتارتىپ پەن ازاماتتىق قاسيەتتەردى تاربيەلەۋدەگى ماڭىزىن اتاپ ءوتىپ، اسكەرگە شاقىرىلۋشىلارعا اسكەري بورىشىن ابىرويمەن وتەۋدى تىلەدى.
«سارباز جولى» ءداستۇرىن قولداۋ ناقتى ىسپەن دە كورىنىس تاپتى. پاۆلودار وبلىسىنىڭ اكىمى اسايىن بايحانوۆ پاۆلودار قالاسىنىڭ قورعانىس ىستەرى باسقارماسىنا قىزمەتتىك اۆتوكولىكتىڭ كىلتىن تابىس ەتتى. جاڭا كولىك باسقارمانىڭ كۇندەلىكتى جۇمىسىن جۇرگىزۋگە، اسكەري-پاتريوتتىق تاربيە بەرۋ جانە جاستاردى اسكەري قىزمەتكە شاقىرۋ باعىتىنداعى مىندەتتەردى ورىنداۋعا ەلەۋلى كومەك كورسەتەدى.
ءوز كەزەگىندە قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور اسقار مۇستابەكوۆ وبلىس اكىمىنە «سارباز جولى» جوباسىن ىسكە اسىرۋعا كورسەتكەن قولداۋى ءۇشىن العىس ءبىلدىردى. ونىڭ ايتۋىنشا، وبلىس اكىمدىگىمەن ءوزارا ءىس-قيمىلدىڭ ماڭىزدى باعىتتارىنىڭ ءبىرى – اسكەري قىزمەتىن اياقتاعان جاستاردى وڭىردەگى ءىرى كاسىپورىندارعا جۇمىسقا ورنالاستىرۋعا جاردەمدەسۋ.
سونىمەن قاتار ول اسكەردە اسكەري قىزمەتشىلەرگە قاجەتتى جاعدايلار جاسالىپ جاتقانىن اتاپ ءوتتى. اسكەري قىزمەتشىلەردى تۇرمىستىق قامتاماسىز ەتۋگە، تاماقتاندىرۋعا، مەديتسينالىق قىزمەت كورسەتۋگە، قاۋىپسىزدىككە جانە اتا-انالارىمەن تۇراقتى بايلانىسىن قامتاماسىز ەتۋگە ەرەكشە كوڭىل بولىنەدى.
– پاۆلودار – ەڭبەكقور ءارى ماقساتشىل ادامداردىڭ ولكەسى. سىزدەر دە ءبىلىمدى، ءتارتىپتى، مىقتى ءارى ەلىنە پايداسى تيەتىن ازامات بولۋعا ۇمتىلىڭىزدار. وسى تۇرعىدان العاندا، ارميا سىزدەر ءۇشىن ءومىردىڭ، ءتارتىپ پەن جاۋاپكەرشىلىكتىڭ مەكتەبىنە اينالادى، – دەدى قورعانىس ءمينيسترىنىڭ ورىنباسارى جاس ساربازدارعا ارناپ سويلەگەن سوزىندە.
ءىس-شارا بارىسىندا ارداگەرلەر، قوعام وكىلدەرى مەن اتا-انالار دا جاس ساربازدارعا جىلى لەبىزدەرىن ءبىلدىرىپ، اسكەري قىزمەتتەن امان-ەسەن ورالۋلارىن تىلەدى.
ءىس-شارا جاس ۇرپاقتى تاربيەلەۋدە مەملەكەت، قوعام جانە وتباسىنىڭ بىرلەسكەن جۇمىسىنىڭ ماڭىزدى ۇلگىسىنە اينالدى. سونىمەن قاتار جاستاردىڭ ەل الدىنداعى جاۋاپكەرشىلىك سەزىمىن قالىپتاستىرۋدىڭ ماڭىزىن ايقىن كورسەتتى.
