فوتو: تۋريزم جانە سپورت مينيسترلىگىنىڭ ءباسپاسوز قىزمەتى
قازاقستاندىق جەڭىل اتلەت كريستينا موروزوۆا جاپونيانىڭ ايتي – ناگويا قالاسىندا ءوتىپ جاتقان حح جازعى ازيا ويىندارىندا كۇمىس جۇلدەگە قول جەتكىزدى، دەپ حابارلايدى "ادىرنا".
سپورتتىق جۇرىستەن سىنعا تۇسكەن ۇلتتىق قۇراما وكىلى جارىستى 1 ساعات 35 مينۋت 25 سەكۋندتا اياقتاپ، ەكىنشى ناتيجە كورسەتتى. التىن مەدال قىتاي سپورتشىسى يان ليۋتسزينگە بۇيىردى. ول 1 ساعات 33 مينۋت 40 سەكۋند كورسەتكىشپەن مارەگە ءبىرىنشى بولىپ جەتتى.
قولا جۇلدەنى دە قىتاي قۇراماسىنىڭ وكىلى يۋنيان تسزيان يەلەندى. ونىڭ ناتيجەسى – 1 ساعات 35 مينۋت 26 سەكۋند.
بۇل باسەكەدە قازاقستان اتىنان تاعى ءبىر سپورتشى ەلميرا كاليمۋللينا ونەر كورسەتتى. ول 1 ساعات 43 مينۋت 21 سەكۋند ناتيجە كورسەتىپ، جارىستى التىنشى ورىنمەن اياقتادى.
كريستينا موروزوۆانىڭ كۇمىس جۇلدەسى قازاقستان قۇراماسىنىڭ ازيا ويىندارىنداعى مەدال قورىن تولىقتىردى. جەڭىل اتلەتيكا باعدارلاماسىنداعى جارىستار ءالى دە جالعاسىپ جاتىر. الداعى سايىستاردا قازاقستاندىق سپورتشىلار جۇلدە ءۇشىن باسەكەگە تۇسەدى.
