پرەمەر-مينيستر ولجاس بەكتەنوۆ مۇناي وڭدەۋ سالاسىن دامىتۋ ماسەلەلەرىنە ارنالعان كەڭەس وتكىزىپ، ءتورتىنشى مۇناي وڭدەۋ زاۋىتىن سالۋ جوباسى بويىنشا كەشەندى باعالاۋدى 2026 جىلدىڭ سوڭىنا دەيىن اياقتاۋدى تاپسىردى، دەپ حابارلايدى «ادىرنا» ءتىلشىسى.
23 قىركۇيەكتە وتكەن كەڭەستە پرەزيدەنت قاسىم-جومارت توقاەۆتىڭ قولدانىستاعى مۇناي وڭدەۋ زاۋىتتارىن جاڭعىرتۋ جانە جاڭا ءموز سالۋ جونىندەگى تاپسىرمالارىنىڭ ورىندالۋ بارىسى قارالدى. «قازمۇنايگاز» ۇلتتىق كومپانياسىنىڭ باسقارما توراعاسى اسحات حاسەنوۆتىڭ مالىمەتىنشە، شىمكەنت مۇناي وڭدەۋ زاۋىتىنىڭ قۋاتىن 2030 جىلعا قاراي جىلىنا 12 ملن تونناعا دەيىن، ال پاۆلودار مۇناي-حيميا زاۋىتىنىڭ قۋاتىن 2031 جىلعا قاراي 9 ملن تونناعا دەيىن ۇلعايتۋ جوسپارلانعان. سونىمەن قاتار اتىراۋ مۇناي وڭدەۋ زاۋىتىندا وندىرىستىك قۋاتتى 6,1 ملن تونناعا دەيىن ارتتىرۋعا باعىتتالعان جوبا جۇزەگە اسىرىلىپ جاتىر.
ۇكىمەتتىڭ مالىمەتىنشە، ءۇش ءىرى مۇناي وڭدەۋ زاۋىتىن كەڭەيتۋ ناتيجەسىندە ولاردىڭ جيىنتىق قۋاتى قازىرگى 17,5 ملن توننادان 28,8 ملن تونناعا دەيىن وسەدى.
كەڭەستە ەنەرگەتيكا مينيسترلىگى ءتورتىنشى مۇناي وڭدەۋ زاۋىتىن سالۋ ماسەلەسى ءالى دە پىسىقتالىپ جاتقانىن حابارلادى. ۆەدومستۆو بولجامىنشا، ۇزاق مەرزىمدى پەرسپەكتيۆادا قازاقستاننىڭ مۇناي وڭدەۋ قۋاتىنا دەگەن سۇرانىسى جىلىنا 40 ملن تونناعا دەيىن جەتۋى مۇمكىن.
وسىعان بايلانىستى پرەمەر-مينيستر ءتورتىنشى ءموز-ءدىڭ قۋاتىن، ورنالاساتىن ورنىن، شيكىزات بازاسىن جانە ەكونوميكالىق مودەلىن ايقىندايتىن كەشەندى باعالاۋدى اياقتاپ، جوبا بويىنشا تۇپكىلىكتى شەشىم قابىلداۋدى تاپسىردى.
سونداي-اق ولجاس بەكتەنوۆ مۇناي وڭدەۋ سالاسىنا ينۆەستيتسيا تارتۋ ءۇشىن نارىقتى ىرىقتاندىرۋدى جالعاستىرۋ قاجەتتىگىن اتاپ ءوتتى. ونىڭ ايتۋىنشا، قازاقستانداعى بەنزين مەن ديزەل وتىنىنىڭ باعاسى كورشىلەس ەلدەرمەن سالىستىرعاندا شامامەن ەكى ەسە تومەن بولعاندىقتان، بۇل سالاعا ينۆەستيتسيا سالۋ ەكونوميكالىق تۇرعىدان ءتيىمسىز بولىپ وتىر.
قازاقستاندا ءتورتىنشى ءىرى ءموز-ءدى سالۋ تۋرالى ەلدى نۇرسۇلتان نازارباەۆ بيلەگەن كەزدەن بەرى ايتىلىپ كەلەدى. بىراق قايدا، قاشان جانە قاشانعا سالىناتىنى ءالى ناقتىلانباعان.
