رەسەي پرەزيدەنتى ۆلاديمير ءپۋتيننىڭ سوچيدەگى «بوچاروۆ رۋچەي» مەملەكەتتىك رەزيدەنتسياسىنىڭ اۋماعىندا اۋقىمدى قۇرىلىس جۇمىستارى جۇرگىزىلىپ جاتىر، دەپ حابارلايدى "ادىرنا".
BBC مالىمەتىنشە، جاڭا نىسانداردىڭ قۇرىلىسى رەسەي فەدەراتسياسىنىڭ فەدەرالدىق كۇزەت قىزمەتىنىڭ (فقق) مەملەكەتتىك قورعانىس تاپسىرىسى اياسىندا جۇزەگە اسىرىلۋدا.
باسىلىمنىڭ حابارلاۋىنشا، رەزيدەنتسيا اۋماعىنداعى ەسكى عيماراتتاردى بۇزۋ جۇمىستارى 2024 جىلى باستالعان. 2025 جىلدىڭ قىركۇيەگىنە قاراي ولاردىڭ ورنىندا ۇلكەن قازانشۇڭقىر پايدا بولعان. بيلىك عيماراتتاردىڭ بۇزىلعانى نەمەسە ونىڭ سەبەپتەرى تۋرالى رەسمي اقپارات تاراتپاعان.
BBC زەرتتەگەن سپۋتنيكتىك سۋرەتتەرگە سايكەس، 2026 جىلدىڭ كۇزىنە قاراي اۋماقتا جاڭا عيماراتتاردىڭ شاتىرلارى كورىنە باستاعان. جاڭا قۇرىلىستىڭ اۋماعى بۇرىنعى نىسانداردان دا ۇلكەن ەكەنى بايقالادى. الايدا سپۋتنيكتىك سۋرەتتەر ارقىلى عيماراتتاردىڭ ناقتى ماقساتى مەن قابات سانىن انىقتاۋ مۇمكىن ەمەس.
BBC جاڭا قۇرىلىسقا قاتىستى مەملەكەتتىك كەلىسىمشارت تۋرالى اقپاراتتى سوت شەشىمدەرىنىڭ بىرىنەن انىقتاعان. قۇجاتتا جۇمىس «رەسەي فقق-نىڭ «بوچاروۆ رۋچەي» نىساندارىن سالۋ جانە قايتا جاڭعىرتۋ» دەپ كورسەتىلگەن. كەلىسىمشارت 2023–2027 جىلدارعا ەسەپتەلگەن.
باسىلىمنىڭ مالىمەتىنشە، جوبانىڭ باس مەردىگەرى رەتىندە قىرىمدا تىركەلگەن «ترانسستروينۆەست» كومپانيالار توبى جۇمىس ىستەيدى. كومپانيانىڭ اتاۋى «بوچاروۆ رۋچەي» اۋماعىندا جۇمىس جۇرگىزگەن بىرنەشە قوسالقى مەردىگەرمەن بولعان سوت داۋلارىندا كەزدەسەدى.
قۇرىلىس جۇمىستارىنا جۇمىسشىلار عالامتورداعى حابارلاما ارقىلى دا تارتىلعان. حابارلاندىرۋلاردا نىساننىڭ كۇزەتى كۇشەيتىلگەن اۋماقتا ورنالاسقانى، جۇمىسشىلاردىڭ قۇجاتتارى تەكسەرىلەتىنى جانە ارنايى رۇقسات قاجەت ەكەنى جازىلعان.
2025 جىلى مونوليتشىلەر، بەتونشىلار، تاس قالاۋشىلار مەن ارماتۋرشىلار ىزدەلگەن. كەيبىر حابارلاندىرۋلاردا نىساننىڭ اتاۋى تىكەلەي كورسەتىلسە، كەيبىرىندە ونىڭ «ستراتەگيالىق» جانە «جابىق» نىسان ەكەنى عانا ايتىلعان.
2026 جىلى قۇرىلىس ماماندارىنا ارنالعان حابارلاما سيپاتى وزگەرىپ، عيماراتتاردىڭ ىشكى ارلەۋ جۇمىستارىنا، سونىڭ ىشىندە جارىقتاندىرۋ جۇيەسىن جانە ەسىكتەردى ورناتاتىن ماماندارعا سۇرانىس ارتقان.
BBC جاڭا كەشەننىڭ جالپى قۇنى ازىرگە بەلگىسىز ەكەنىن جازادى. باسىلىم انىقتاعان جەكەلەگەن مەردىگەرلىك جۇمىستاردىڭ قۇنى 90 ميلليوننان 500 ميلليون رۋبلگە دەيىن بولعان.
«بوچاروۆ رۋچەي» — سوچي قالاسىندا ورنالاسقان رەسەي پرەزيدەنتىنىڭ رەسمي مەملەكەتتىك رەزيدەنتسياسى. BBC مالىمەتىنشە، جاڭا قۇرىلىس جۇمىستارىنىڭ ناقتى قانداي نىسانداردى قامتيتىنى جانە كەشەننىڭ تۇپكىلىكتى قانداي ماقساتتا پايدالانىلاتىنى ازىرگە اشىق جاريالانباعان.
