كاسپي تەڭىزىندە 14 اسكەري قىزمەتشىنىڭ قازا بولۋىنا بايلانىستى ۇستالعان قازاقستان اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى دانيار حايرۋشەۆتىڭ قىزى جەلىدە ۇندەۋ جاريالادى، دەپ حابارلايدى "ادىرنا".
ول قازا تاپقان اسكەري قىزمەتشىلەردىڭ تۋعان-تۋىستارى مەن جاقىندارىنا كوڭىل ايتىپ، تەرگەۋ اياقتالماي تۇرىپ تۇپكىلىكتى قورىتىندى جاساماۋعا شاقىردى.
حايرۋشەۆتىڭ قىزى بۇل ۇندەۋدى ەڭ الدىمەن ۇستالعان اسكەري قىزمەتشىنىڭ قىزى رەتىندە جازعانىن اتاپ ءوتتى. ونىڭ ايتۋىنشا، مارقۇمداردىڭ وتباسىلارى قانداي اۋىر جاعدايدى باستان وتكەرىپ جاتقانىن تۇسىنەدى جانە ءاربىر قازا بولعان اسكەري قىزمەتشىنىڭ جاقىندارىنا كوڭىل ايتادى.
ول تەرگەۋ بارىسىندا اسكەري وقۋ-جاتتىعۋدى ۇيىمداستىرۋ كەزىندە قانداي شەشىمدەر قابىلدانعانىن، كىم قانداي بۇيرىق بەرگەنىن جانە اسكەري قىزمەتشىلەردىڭ قاۋىپسىزدىگىنە ناقتى كىم جاۋاپتى بولعانىن انىقتاۋ ماڭىزدى ەكەنىن ايتتى.
«ەگەر بىرەۋ قىلمىستىق نەمقۇرايلىلىق تانىتىپ، زاڭسىز شەشىم قابىلداسا نەمەسە قايعىلى جاعدايعا اكەلگەن بۇيرىق بەرسە، ول ادام زاڭعا سايكەس جاۋاپ بەرۋى ءتيىس»، – دەدى ول.
سونىمەن قاتار حايرۋشەۆتىڭ قىزى اكەسىنىڭ باسقا ادامدار قابىلداعان شەشىمدەر ءۇشىن جاۋاپقا تارتىلۋىنا الاڭدايتىنىن جەتكىزدى. ول ءىستى جان-جاقتى ءارى وبەكتيۆتى قاراۋعا شاقىردى.
