«جەل شىعارعانى ءۇشىن ورىندىقپەن ۇرعان»: اقتوبەگە اسكەرگە كەتكەن 18 جاستاعى ساربازدىڭ جاعدايى اۋىر

2249
Adyrna.kz Telegram

اقتوبەگە اسكەرگە كەتكەن 18 جاستاعى ساربازدىڭ جاعدايى ناشار. بۇل تۋرالى جۋرناليست گۇلميرا ابىقاي Instagram پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.

ء“وزى جامبىل وبلىسىنىڭ، رىسقۇلوۆ اۋدانىنان اقتوبە قالاسىنداعى 6655 اسكەري بولىمگە تۇسەدى. انت قابىلداۋدان بۇرىن تاياق جەپ ۇلگەرەدى. وتبوي كەزىندە جەل شىعارعانى ءۇشىن سەرجانت باسىنان ورىندىقپەن ۇرعان. ەرتەڭىنە ساپقا تۇرعاندا ەسىنەن تانىپ قۇلاعان الدياردىڭ سودان بەرى تالماسى ۇستايدى. ودان كەيىن انتتى قالاي قابىلداعانى بەلگىسىز؟

وسىنداي سۋدورگامەن 2 اي جۇرگەن جاۋىنگەر اقىرى اۋرۋحاناعا تۇسەدى. اكەسى كەڭەسبەك ابدىرايىموۆقا اۋرۋحانادان بەلگىسىز جان حابارلاسىپ، بالاسىنىڭ وسىندا جاتقانىن ايتقان. مۇنى ەستىگەن اكەسى اقتوبەگە بارىپ، ۇلىن ەمدەۋگە قاتىستى وتپۋسك الادى. ەندى 7-ءشى قازاندا وتپۋسكى بىتەدى، بالام مىنا تۇرىمەن قالاي بورىشىن وتەيدى دەپ زار جىلايدى اتا-انا.

وسى مەن اسكەريلەرگە تاڭىم بار، ءبىر بولىمشەدە ءبىر نارسەنى بۇلدىرەدى دە ءىس قوزعالسا نە اۋىسىپ كەتەدى نە جۇمىستان شىعىپ كەتەدى. الدىنداعى مارقۇم الىبەك قالبايدى قورلادى دەگەن وفيتسەرلەر دە ءجاي عانا وزگە بولىمگە اۋىسىپ كەتكەن.

قىسقاسى بىلاي، جاقىندا پرەزيدەنت سايلاۋى. ەندى ۇمىتكەردەن الەۋمەتتىك-مادەني سالامەن قاتار اسكەرگە كەتكەن بالانىڭ امان قايتۋىنا مەملەكەتتىك كەپىلدىك بەرۋىن ءوز باعدارلاماسىنا قوسۋىن تالاپ ەتەيىك. ايتپەسە، زىڭگىتتەي 18-دەگى جىگىتتەر وتان الدىنداعى بورىشىن وتەۋگە كەتىپ ءبىرى اۋرۋ، ءبىرى تابىتپەن ورالۋدا. ءسىز نە دەيسىز؟، – دەپ جازدى جۋرناليست.

الديار كەڭەسبەكتى 7-ماۋسىمدا وقىپ جۇرگەن جەرىنەن ەشكىمگە ەسكەرتپەستەن اسكەرگە الىپ كەتكەن. تاڭەرتەڭ تارازداعى كوللەدجگە ەمتيحانعا كەتكەن بالا كەشكە توبىمەن اسكەرگە اتتانىپتى.

ايتۋىنشا، ءبولىم تابالدىرىعىن اتتاي سالا تاياق جەگەن. سەرجانتتار ۇزاق ۋاقىت جارتىلاي وتىرعىزىپ قويىپ، ابدەن قيناعان كورىنەدى.

«جەل جىبەرىپ قويدىم، ءبارى فۋ -فۋ دەپ كەتتى. باسقا جاققا بارىپ تۇرعانمىن. "كىم وسىردى؟" دەدى. "مەن" دەدىم. ورىندىقپەن باسىمنان ۇرا جونەلدى. ارى قاراي ەسىمدى بىلمەيمىن. تالىپ قالدىم. ەمدەۋ بولىمىنە اپاردى سول جەردە ەسىمدى جينادىم،- دەيدى الديار.

ودان سوڭ الديار تالىپ قارا بەرەتىن بولعان. 2 ايداي ۋاقىت اۋىرىپ، ەمىن تاپپاعان. كەيىن اكەسى ونى دارىگەرلەرگە قاراتۋ ءۇشىن تارازعا الىپ كەتكەن.

6655 اسكەري ءبولىمىنىڭ وكىلدەرى الديار كەڭەسبەككە ەشقانداي كۇش كورسەتىلمەگەنىن ايتادى.

ال الدياردىڭ اكەسى ۇلىن اسكەرگە قايتا جىبەرمەيتىنىن ايتتى.

”ادىرنا” ۇلتتىق پورتالى

پىكىرلەر