Aqtóbege áskerge ketken 18 jastaǵy sarbazdyń jaǵdaıy nashar. Bul týraly jýrnalıst Gúlmıra Ábiqaı Instagram paraqshasynda jarııalady, dep habarlaıdy “Adyrna” ulttyq portaly.
“Ózi Jambyl oblysynyń, Rysqulov aýdanynan Aqtóbe qalasyndaǵy 6655 áskerı bólimge túsedi. Ant qabyldaýdan buryn taıaq jep úlgeredi. Otboı kezinde jel shyǵarǵany úshin serjant basynan oryndyqpen urǵan. Erteńine sapqa turǵanda esinen tanyp qulaǵan Aldııardyń sodan beri talmasy ustaıdy. Odan keıin antty qalaı qabyldaǵany belgisiz?
Osyndaı sýdorgamen 2 aı júrgen jaýynger aqyry aýrýhanaǵa túsedi. Ákesi Keńesbek Ábdiraıymovqa aýrýhanadan belgisiz jan habarlasyp, balasynyń osynda jatqanyn aıtqan. Muny estigen ákesi Aqtóbege baryp, ulyn emdeýge qatysty otpýsk alady. Endi 7-shi qazanda otpýski bitedi, balam myna túrimen qalaı boryshyn óteıdi dep zar jylaıdy ata-ana.
Osy men áskerılerge tańym bar, bir bólimshede bir nárseni búldiredi de is qozǵalsa ne aýysyp ketedi ne jumystan shyǵyp ketedi. Aldyndaǵy marqum Álibek Qalbaıdy qorlady degen ofıerler de jáı ǵana ózge bólimge aýysyp ketken.
Qysqasy bylaı, jaqynda Prezıdent saılaýy. Endi úmitkerden áleýmettik-mádenı salamen qatar áskerge ketken balanyń aman qaıtýyna memlekettik kepildik berýin óz baǵdarlamasyna qosýyn talap eteıik. Áıtpese, zińgitteı 18-degi jigitter Otan aldyndaǵy boryshyn óteýge ketip biri aýrý, biri tabytpen oralýda. Siz ne deısiz?, – dep jazdy jýrnalıst.
Aldııar Keńesbekti 7-maýsymda oqyp júrgen jerinen eshkimge eskertpesten áskerge alyp ketken. Tańerteń Tarazdaǵy kolledjge emtıhanǵa ketken bala keshke tobymen áskerge attanypty.
Aıtýynsha, bólim tabaldyryǵyn attaı sala taıaq jegen. Serjanttar uzaq ýaqyt jartylaı otyrǵyzyp qoıyp, ábden qınaǵan kórinedi.
«Jel jiberip qoıdym, bári fý -fý dep ketti. Basqa jaqqa baryp turǵanmyn. "Kim osyrdy?" dedi. "Men" dedim. Oryndyqpen basymnan ura jóneldi. Ary qaraı esimdi bilmeımin. Talyp qaldym. Emdeý bólimine apardy sol jerde esimdi jınadym,- deıdi Aldııar.
Odan soń Aldııar talyp qara beretin bolǵan. 2 aıdaı ýaqyt aýyryp, emin tappaǵan. Keıin ákesi ony dárigerlerge qaratý úshin Tarazǵa alyp ketken.
6655 áskerı bóliminiń ókilderi Aldııar Keńesbekke eshqandaı kúsh kórsetilmegenin aıtady.
Al Aldııardyń ákesi ulyn áskerge qaıta jibermeıtinin aıtty.
”Adyrna” ulttyq portaly
