فوتو: سقو پد
پەتروپاۆلدىڭ 42 جاستاعى تۇرعىنى يرينا انتونەنكو 25 قىركۇيەكتە، قازاقستاندا جالپىۇلتتىق ازا تۇتۋ كۇنى جاريالانعان ۋاقىتتا جەلىدە بيلەگەن، دەپ حابارلايدى "ادىرنا".
ول قارالى كۇنى TikTok جەلىسىندە تىكەلەي ەفيرگە شىعىپ، كوڭىلدى انگە بيلەگەن. كەيىن ونىڭ ارەكەتى الەۋمەتتىك جەلىدە قىزۋ تالقىعا ءتۇستى.
ەفير كەزىندە كورەرمەندەر انتونەنكونىڭ ارەكەتىن سىناعان. بۇعان جاۋاپ رەتىندە ول قازا تاپقان اسكەري قىزمەتشىلەردى جەكە تانىمايتىنىن ايتىپ، وقيعاعا بايلانىستى ءومىر سالتىن وزگەرتۋدى قاجەت دەپ سانامايتىنىن جەتكىزگەن.
سولتۇستىك قازاقستان وبلىسىنىڭ پوليتسيا دەپارتامەنتى ايەلدىڭ ارەكەتىنە بايلانىستى تەكسەرۋ جۇرگىزىپ، ماتەريالداردى سوتقا جولداعان.
«29 قىركۇيەكتە سوت ايەلگە ۇساق بۇزاقىلىق جاساعانى ءۇشىن 10 تاۋلىك اكىمشىلىك قاماۋ تاعايىندادى. فاكتىگە زاڭدا بەلگىلەنگەن تارتىپپەن قۇقىقتىق باعا بەرىلدى. «زاڭ مەن ءتارتىپ» قاعيداتى بارشاعا ورتاق»، – دەپ حابارلادى پوليتسيا.
ەسكە سالايىق، 24 قىركۇيەكتە ماڭعىستاۋ وبلىسىنداعى وقۋ-جاتتىعۋ كەزىندە اسكەري قىزمەتشىلەر قازا تاپقان. وسىعان بايلانىستى پرەزيدەنت قاسىم-جومارت توقاەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالاعان ەدى.
