فوتو: اقوردا
سەنات توراعالىعىنان كەتكەن ماۋلەن اشىمباەۆ نەمەن اينالىسىپ جۇرگەنىن ايتتى. ول شەيح زايد اتىنداعى «ادامزات باۋىرلاستىعى ءۇشىن» حالىقارالىق سىيلىعىنىڭ قازىلار القاسىنىڭ قۇرامىنا كىردى. بۇل تۋرالى ماۋلەن اشىمباەۆ الەۋمەتتىك پاراقشاسىندا جازدى،دەپ حابارلايدى “ادىرنا”.
اشىمباەۆتىڭ ايتۋىنشا، ول شەيح زايد اتىنداعى «ادامزات باۋىرلاستىعى ءۇشىن» حالىقارالىق سىيلىعىنىڭ 2027 جىلعى لاۋرەاتتارىن انىقتايتىن قازىلار القاسىنىڭ قۇرامىنا ەنگەن.
قازىلار القاسىنا ونى ءال-ازھاردىڭ باس يمامى احمەد ات-تايەبتىڭ ۇسىنىسىمەن ەنگىزگەن.
«2027 جىلعى لاۋرەاتتاردى انىقتاۋ جونىندەگى قازىلار القاسىنىڭ قۇرامىنا ەنگەنىم مەن ءۇشىن ۇلكەن مارتەبە»، – دەپ جازدى سەنات توراعاسى.
ونىڭ مالىمەتىنشە، قازىلار القاسىنىڭ قۇرامىنا پورتۋگاليانىڭ بۇرىنعى پرەزيدەنتى مارسەلۋ رەبەلۋ دە سوۋزا، بۇۇ-نىڭ بوسقىندار ءىسى جونىندەگى بۇرىنعى جوعارعى كوميسسارى، يراكتىڭ بۇرىنعى پرەزيدەنتى بارحام سالەح، ليۆاننىڭ ءبىرىنشى حانىمى نەحمات اۋن جانە پاپا كەڭەسىنىڭ مادەنيەت جونىندەگى بۇرىنعى توراعاسى كاردينال دجانفرانكو راۆازي كىرگەن.
شەيح زايد اتىنداعى «ادامزات باۋىرلاستىعى ءۇشىن» سىيلىعى مادەنيەتتەر مەن دىندەر اراسىنداعى ديالوگتى، بەيبىتشىلىك پەن ءوزارا تۇسىنىستىكتى دامىتۋعا ۇلەس قوسقان ادامدار مەن ۇيىمدارعا بەرىلەدى.
اشىمباەۆ بۇل جۇمىستى قازاقستاننىڭ مادەنيەتارالىق جانە دىنارالىق ديالوگ سالاسىندا جيناقتاعان تاجىريبەسىن حالىقارالىق دەڭگەيدە تانىستىرۋعا مۇمكىندىك بەرەتىنىن اتاپ ءوتتى.
«قازىلار القاسىنىڭ قۇرامىنداعى جۇمىس بەيبىتشىلىك پەن ءوزارا تۇسىنىستىك قۇندىلىقتارىن ىلگەرىلەتۋگە، سونداي-اق قازاقستاننىڭ مادەنيەتارالىق جانە دىنارالىق ديالوگ سالاسىندا جيناقتاعان تاجىريبەسىن تانىستىرۋعا ۇلەس قوسۋعا مۇمكىندىك بەرەدى دەپ سەنەمىن»، – دەدى ول.
