قازاقستانداعى 250 مەكتەپتە ەڭبەك ەتەتىن 25 مىڭعا جۋىق پەداگوگ «ۇستاز ايتسا» رەسپۋبليكالىق ديالوگ الاڭى اياسىندا ءبىلىم ساپاسىن ارتتىرۋعا قاتىستى ءوز ۇسىنىستارىن تىكەلەي جەتكىزدى. «ادىلەت» پارتياسىنىڭ بۇل جوباسى ۇستازدار كۇنىنە وراي ۇيىمداستىرىلدى. نەگىزگى كەزدەسۋ ەلورداداعى №101 مەكتەپتىڭ پەداگوگيكالىق ۇجىمىمەن ءوتتى.
ديالوگ الاڭىنىڭ نەگىزگى ماقساتى – پەداگوگتەردىڭ پىكىرلەرىن تىڭداپ، ءبىلىم بەرۋ جۇيەسىن ودان ءارى دامىتۋعا باعىتتالعان ناقتى ۇسىنىستارىن جيناۋ.
بۇگىن ۇستازدار كۇنىنە وراي سويلەگەن سوزىندە مەملەكەت باسشىسى قاسىم-جومارت توقاەۆ پەداگوگتەردىڭ تەك ءبىلىم بەرۋدە عانا ەمەس، وسكەلەڭ ۇرپاقتى تاربيەلەۋدەگى ەرەكشە ءرولىن اتاپ ءوتتى.
«كوزى اشىق، كوكىرەگى وياۋ، تاربيەلى، زاڭعا باعىناتىن ادال ازاماتتار ەڭ الدىمەن مەكتەپتەگى مۇعالىمنەن ءتالىم الادى»، – دەدى پرەزيدەنت.
پەداگوگ مارتەبەسىن جۇيەلى تۇردە ارتتىرۋ – ءبىلىم بەرۋ سالاسىنداعى مەملەكەتتىك ساياساتتىڭ باسىم باعىتتارىنىڭ ءبىرى. 2019 جىلدان بەرى «پەداگوگ مارتەبەسى تۋرالى» زاڭ قولدانىستا، مۇعالىمدەردىڭ جالاقىسى ەكى ەسە ءوستى، سونداي-اق پەداگوگتەردى وزىنە ءتان ەمەس مىندەتتەرگە تارتۋدان قورعاۋ زاڭنامالىق تۇرعىدا بەكىتىلدى. سونىمەن قاتار مەكتەپ ينفراقۇرىلىمىن دامىتۋ جالعاسۋدا. «كەلەشەك مەكتەپتەرى» ۇلتتىق جوباسى اياسىندا ەلىمىزدىڭ بارلىق وڭىرىندە 460 مىڭنان استام وقۋشى ورنىنا ارنالعان 217 مەكتەپ سالىنىپ، پايدالانۋعا بەرىلدى.
وسى جۇمىستى جالعاستىرۋ جانە ءبىلىم بەرۋ ساپاسىن ودان ءارى دامىتۋ ماسەلەلەرى استانادا وتكەن «ۇستاز ايتسا» كەزدەسۋىنىڭ نەگىزگى تاقىرىبىنا اينالدى. ءىس-شاراعا قۇرىلتاي دەپۋتاتتارى، «ادىلەت» پارتياسى فراكتسياسىنىڭ مۇشەلەرى اسحات ايماعامبەتوۆ، جارقىنبەك امانتاي، ءلاززات جىلقىباەۆا، «ادىلەت» پارتياسى توراعاسىنىڭ ورىنباسارى ەرجان جىلقىباەۆ، وقۋ-اعارتۋ ۆيتسە-ءمينيسترى جايىق شاراباسوۆ، ەلوردالىق ۇستازدار مەن ءبىلىم بەرۋ سالاسىنىڭ وكىلدەرى قاتىستى.
ەرجان جىلقىباەۆتىڭ ايتۋىنشا، پارتيا پەداگوگ مارتەبەسىن ارتتىرۋعا جانە ولاردىڭ كاسىبي قۇقىقتارىن قورعاۋعا باعىتتالعان شارالاردى قولداۋدى جالعاستىرادى. بۇل رەتتە ءبىلىم بەرۋ سالاسىنا قاتىستى شەشىمدەردى تالقىلاۋ كەزىندە مۇعالىمدەردىڭ تىكەلەي قاتىسۋىن قامتاماسىز ەتۋ ماڭىزدى قاعيداتتاردىڭ ءبىرى بولۋعا ءتيىس. سونىمەن قاتار پارتيا باعدارلاماسىندا 2031 جىلعا قاراي وندىرىستىك ورتادا ءبىلىم الاتىن ستۋدەنتتەردىڭ ۇلەسىن كەمىندە 45 پايىزعا جەتكىزۋ مىندەتى بەلگىلەنگەن.
«پەداگوگتەردى قولداۋ تۋرالى ايتىپ قانا قويماي، ولاردىڭ پىكىرىن تىڭداپ، ناقتى ۇسىنىستارىن ەسكەرۋ ماڭىزدى. سونىمەن قاتار جاستاردىڭ وقۋ كەزىندە كاسىبي تاجىريبە جيناقتاۋى ءۇشىن ءبىلىم مەن پراكتيكانىڭ بايلانىسىن كۇشەيتۋ قاجەت. مەملەكەت باسشىسىنىڭ ءبىلىم مەن عىلىمدى دامىتۋ ساياساتىن قولداي وتىرىپ، «ادىلەت» پارتياسى وسى مىندەتتەردىڭ جۇزەگە اسۋىنا اتسالىسادى»،– دەدى ەرجان جىلقىباەۆ.
قۇرىلتاي دەپۋتاتى، «ادىلەت» پارتياسى فراكتسياسىنىڭ مۇشەسى اسحات ايماعامبەتوۆ پەداگوگتەردىڭ كاسىبي قۇقىقتارىن قورعاۋ جانە ولاردىڭ مارتەبەسىن ودان ءارى ارتتىرۋ ماسەلەلەرىنە جەكە توقتالدى. ول بۇل جۇمىستى مۇعالىمدەردىڭ وزدەرى كوتەرىپ وتىرعان ماسەلەلەر مەن ۇسىنىستاردى ەسكەرە وتىرىپ جالعاستىرۋ قاجەت ەكەنىن اتاپ ءوتتى.
كەزدەسۋدىڭ نەگىزگى بولىگى پەداگوگتەرمەن تىكەلەي پىكىر الماسۋعا ارنالدى. №101 مەكتەپتىڭ مۇعالىمدەرى بالالاردى وقىتۋ مەن تاربيەلەۋ، جاڭا تەحنولوگيالاردى پايدالانۋ، سىني ويلاۋدى دامىتۋ جانە وقۋشىلاردىڭ قابىلەتىن اشۋ ماسەلەلەرى بويىنشا ءوز ۇسىنىستارى مەن تاجىريبەلەرىمەن ءبولىستى.
قازاق ءتىلى مەن ادەبيەتى ءپانىنىڭ مۇعالىمى ەلميرا شاۋەنوۆا وقۋشىلاردىڭ سىني ويلاۋ قابىلەتىن دامىتۋ، ۇلتتىق جانە رۋحاني-ادامگەرشىلىك قۇندىلىقتاردى قالىپتاستىرۋ ماسەلەلەرىنە توقتالدى. ماتەماتيكا ءپانىنىڭ مۇعالىمى سالتانات شادەن ساباققا دايىندىق كەزىندە جانە وقۋ ماتەريالدارىن ازىرلەۋدە جاساندى ينتەللەكت پەن تسيفرلىق قۇرالداردى پايدالانۋ تاجىريبەسىمەن ءبولىستى. ينفورماتيكا ءپانىنىڭ مۇعالىمى جاننۇر ەرجانوۆا وقۋشىلاردىڭ پانگە قىزىعۋشىلىعىن ارتتىرۋ جانە ولاردىڭ جەكە قابىلەتتەرىن اشۋ تاسىلدەرىن ۇسىندى. باستاۋىش سىنىپ مۇعالىمى گۇلسارا وسپانوۆا مەكتەپتىڭ العاشقى جىلدارىنان باستاپ وقىتۋ مەن تاربيەنى ۇشتاستىرۋ ماسەلەسىن كوتەردى. ال گەوگرافيا ءپانىنىڭ مۇعالىمى نۇربەك ەرىكۇلى مۇعالىمنىڭ قوعامداعى ءرولى، پەداگوگ مارتەبەسى جانە زاماناۋي ۇستازدىڭ كاسىبي بولمىسىنا قاتىستى پىكىرىن ءبىلدىردى.
ەلىمىزدىڭ 250 مەكتەبىندە وتكەن «ۇستاز ايتسا» كەزدەسۋلەرى بارىسىندا پەداگوگتەردەن تۇسكەن ۇسىنىستار جۇيەلەنىپ، ودان ءارى پىسىقتاۋ جانە ناقتى جۇمىس بارىسىندا قاراۋ ءۇشىن باعىتتالادى.
ءىس-شارانىڭ قورىتىندىسىندا ءبىلىم بەرۋ سالاسىنا قوسقان ۇلەسى مەن كاسىبي قىزمەتىندەگى ەڭبەگى ءۇشىن پەداگوگتەركە «ادىلەت» پارتياسىنىڭ جانە قازاقستان رەسپۋبليكاسى وقۋ-اعارتۋ مينيسترلىگىنىڭ العىس حاتتارى تابىستالدى.
ايتا كەتەيىك، مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «كىتاپ وقيتىن ۇلت» اۋقىمدى رەسپۋبليكالىق جوباسىن قولداۋ ماقساتىندا استانا قالاسىنداعى №101 جالپى ورتا ءبىلىم بەرەتىن مەكتەپ كىتاپحاناسىنا پارتيا توراعاسىنىڭ اتىنان ءتۇرلى جانرداعى كىتاپتار سىيعا تارتىلدى.
ء"بىر قولىندا رۋل، ءبىر قولىندا ءسابي": 5 ايلىق نارەستەسىمەن تاكسي جۇرگىزگەن جالعىزباستى انا (ۆيدەو)
