ۋكراينا پرەزيدەنتى ۆلاديمير زەلەنسكي وتستاۆكاعا كەتۋدى جوسپارلامايتىنىن مالىمدەپ، قازىرگى ۋاقىتتا سايلاۋ وتكىزۋ مۇمكىندىگىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
زەلەنسكي جۋرناليست پيرس مورگاننىڭ «Uncensored» باعدارلاماسىنا قوناق بولعان.
ۋكراينا باسشىسى قىزمەتىنەن كەتۋ ويىندا جوق ەكەنىن راستادى. ونىڭ ايتۋىنشا، بۇل — ءوز جاۋاپكەرشىلىگى.
«ارينە، جوق. بۇل — مەنىڭ جاۋاپكەرشىلىگىم»، — دەپ جاۋاپ بەردى زەلەنسكي ءجۋرناليستىڭ سۇراعىنا.
سونداي-اق ساياساتكەر دونالد ترامپتى قوسا العاندا، بىرقاتار تۇلعانىڭ سايلاۋ وتكىزۋگە شاقىرعانىنا قاراماستان، قازىرگى جاعدايدا ونى ۇيىمداستىرۋ مۇمكىن ەمەس ەكەنىن ايتتى.
«بىزگە ساعات سايىن شابۋىل جاسالىپ جاتىر... سوندىقتان قاۋىپسىزدىك تۇرعىسىنان سايلاۋ وتكىزۋ مۇمكىن ەمەس»، — دەپ ءتۇسىندىردى زەلەنسكي.
ۋكراينا پرەزيدەنتى مايداندا جۇرگەن ساربازداردىڭ دا سايلاۋعا قاتىسۋ قۇقىعى بولۋى كەرەكتىگىن اتاپ ءوتتى. ونىڭ پىكىرىنشە، ولار داۋىس بەرۋگە ءبىرىنشى كەزەكتە مۇمكىندىك الۋى ءتيىس.
ء«بىز ساربازداردىڭ قاتىسۋىنسىز پرەزيدەنتتى سايلاي المايمىز. ويتكەنى ولار ءوز ءومىرىن قيىپ جاتىر، ءتىپتى قيعاندارى با بار. داۋىس بەرۋگە ءبىرىنشى كەزەكتە سولاردىڭ قۇقىعى بولۋى كەرەك. مەنىڭ ويىمشا، بۇل — ادىلەتتى»، — دەپ تۇيىندەدى ول.
ايتا كەتەيىك، زەلەنسكيدىڭ پرەزيدەنتتىك وكىلەتتىك مەرزىمى رەسمي تۇردە 2024 جىلعى 20 مامىردا اياقتالعان. الايدا كيەۆ اسكەري جاعداي اياقتالعانعا دەيىن سايلاۋ وتكىزۋ مۇمكىن ەمەس ەكەنىن العا تارتىپ، كەزەكتى سايلاۋدى ۇيىمداستىرمادى.
10 قازاندا ترامپ جۋرناليستەرمەن اڭگىمە بارىسىندا ۆلاديمير زەلەنسكي سايلاۋ وتكىزۋى كەرەك ەكەنىن مالىمدەگەن ەدى. سونداي-اق ونىڭ ۋكرايناداعى قاقتىعىستى اياقتاپ، بەيبىت كەلىسىمگە قول جەتكىزۋگە بىرنەشە رەت مۇمكىندىگى بولعانىن ايتقان.
