اقش پرەزيدەنتى دونالد ترامپ يراندى ۇزاق مەرزىمدى بلوكاداعا الۋ جوسپارىن ازىرلەۋدى تاپسىردى. بۇل تۋرالى The Wall Street Journal باسىلىمى جازدى، دەپ حابارلايدى «ادىرنا» ءتىلشىسى.
سوڭعى كۇندەرى امەريكالىق كوشباسشى يران استاناسى تەگەرانعا ەكونوميكالىق قىسىمدى ودان ءارى كۇشەيتۋ يدەياسىن قولداعان. اڭگىمە يراندىق كەمەلەردىڭ، سونىڭ ىشىندە مۇناي تانكەرلەرىنىڭ ەل پورتتارىنان شىعۋىن شەكتەۋى مۇمكىن شارالار تۋرالى بولىپ وتىر.
گازەت سۇحباتتاستارى ۆاشينگتوندا بلوكادانى يرانعا قايتا سوققى جاساۋمەن نەمەسە اقش-تىڭ قاقتىعىستان تولىق شىعۋىمەن سالىستىرعاندا تاۋەكەلى از نۇسقا رەتىندە قاراستىرىپ جاتقانىن ايتادى.
WSJ مالىمەتىنشە، امەريكالىق اكىمشىلىك ىشىندە الداعى ستراتەگيا جونىندە ورتاق ۇستانىم جوق. شەنەۋنىكتەردىڭ ءبىر بولىگى يرانعا قىسىمدى كۇشەيتۋدى قولداسا، ەندى بىرەۋلەرى مۇنىڭ اقش ەكونوميكاسىنىڭ وزىنە ىقتيمال سالدارى بولۋى مۇمكىن ەكەنىن ەسكەرتەدى.
باسىلىم اتاپ وتكەندەي، ەرەكشە الاڭداۋشىلىق ورمۇز بۇعازى ماڭىنداعى جاعدايعا بايلانىستى بولىپ وتىر. ۆاشينگتوندا ونىڭ ۇزاق ۋاقىتقا جابىلۋى نەمەسە قارسىلاسۋدىڭ جالعاسۋى ينفلياتسيالىق قىسىمدى كۇشەيتىپ، اقش-تاعى ارالىق كونگرەسس سايلاۋى قارساڭىندا رەسپۋبليكالىق پارتيانىڭ جاعدايىن قيىنداتۋى مۇمكىن دەپ قاۋىپتەنەدى.
