ازاماتتىڭ اتىنا راسىمدەلگەن تۋىستارىنىڭ پاتەرى نەمەسە اۆتوكولىگى الەۋمەتتىك كومەك تاعايىنداۋ كەزىندە وتباسىنىڭ ماتەريالدىق جاعدايىن باعالاۋعا ىقپال ەتۋى مۇمكىن. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەربول تۇياقباەۆ مالىمدەدى، دەپ حابارلايدى “ادىرنا”.
مينيسترلىك وكىلدەرىنىڭ تۇسىندىرۋىنشە، ەگەر پاتەر نەمەسە كولىك ءىس جۇزىندە تۋىسىنا تيەسىلى بولعانىمەن، قۇجات جۇزىندە باسقا ادامنىڭ اتىنا تىركەلسە، اقپاراتتىق جۇيەلەر بۇل مۇلىكتى سول ادامنىڭ اكتيۆى رەتىندە ەسەپكە الۋى مۇمكىن.
مۇنداي جاعدايدىڭ الەۋمەتتىك كومەك تاعايىنداۋعا كەرى اسەرىن بولدىرماۋ ءۇشىن مەملەكەتتىك دەرەكقورلارداعى مالىمەتتەردى ناقتىلاپ، قاجەت بولعان جاعدايدا تۇزەتۋ ەنگىزۋ كەرەك. ول ءۇشىن ازاماتتار ەڭبەك جانە حالىقتى الەۋمەتتىك قورعاۋ مينيسترلىگىنە نەمەسە جەرگىلىكتى اكىمدىككە جۇگىنە الادى. سونداي-اق ەلەكتروندىق سەرۆيستەردى پايدالانۋعا مۇمكىندىك بار.
ء«بىز وسىنداي جاعدايلاردى رەتتەۋ ءۇشىن ءتيىستى مۇمكىندىك قاراستىرىپ وتىرمىز. مۇنداي جايتتار كەزدەسۋى مۇمكىن، سوندىقتان ارقايسىسىن بىرلەسىپ پىسىقتايمىز. ەشقانداي ماسەلە تۋىنداماۋى كەرەك»، – دەدى ەربول تۇياقباەۆ.
