ەڭبەك ءمينيسترى وتباسىنىڭ تابىسىن جاريالادى

فوتو: ۇكىمەتتىڭ ءباسپاسوز قىزمەتى

ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ قازاقستانداعى وتباسىلاردىڭ الەۋمەتتىك جاعدايىن باعالاۋعا ارنالعان ونلاين-كالكۋلياتوردى تانىستىردى. مينيستر ءوزىنىڭ تابىسى مەن وتباسى تۋرالى مالىمەتتەردى ەنگىزىپ، قاي ساناتقا جاتاتىنىن تەكسەردى، دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەپ.

اسقاربەك ەرتاەۆتىڭ ايتۋىنشا، ول 49 جاستا، اي سايىنعى جالاقىسى – 1,2 ميلليون تەڭگە. جۇبايى جۇمىس ىستەمەيدى، وتباسىندا ءتورت بالا بار.

ءمينيستردىڭ استانا قالاسىندا اۋدانى 100 جانە 60 شارشى مەتر بولاتىن ەكى پاتەرى بار. سونىمەن قاتار، ول 2013 جىلعى Toyota Camry 50 اۆتوكولىگىن مىنەدى. وتباسىندا جەكە بيزنەس تە، جەر ۋچاسكەلەرى دە جوق.

ءمينيستردىڭ 29 جاستاعى ۇلكەن ۇلى ايىنا 600 مىڭ تەڭگە تابىس تاپسا، 23 جاستاعى ورتانشى ۇلىنىڭ ايلىق كىرىسى – 400 مىڭ تەڭگە. سونداي-اق وتباسىندا 13 جاستاعى قىزى مەن ءتورت جاسار كەنجە ۇلى بار.

ونلاين-كالكۋلياتورعا ەنگىزىلگەن دەرەكتەر بويىنشا، ءمينيستردىڭ وتباسى B ساناتىنا جاتقىزىلدى. بۇل ساناتتاعى وتباسىلار الەۋمەتتىك تولەمدەردىڭ باسىم بولىگىن الۋعا ۇمىتكەر بولا المايدى.

«سوڭعى رەت ءتورتىنشى بالامىز دۇنيەگە كەلگەندە جاردەماقى الدىق. بۇل 2022 جىلى بولعان ەدى. سودان بەرى ەشقانداي جاردەماقى المايمىز. ەگەر قازىر قانداي دا ءبىر جاردەماقى الىپ جۇرگەن بولسام، ودان باس تارتۋعا دايىن بولار ەدىم»، – دەدى اسقاربەك ەرتاەۆ.

ايتا كەتسەك، قازاقستاندا الەۋمەتتىك ءال-اۋقات دەڭگەيىن بەس ساناتقا – A, B, C, D جانە E توپتارىنا ءبولۋ جوسپارلانىپ وتىر. وتباسىنىڭ قاي ساناتقا جاتاتىنى مەملەكەتتىك اقپاراتتىق جۇيەلەردەگى وتباسى قۇرامى مەن تابىسىنا قاتىستى مالىمەتتەر نەگىزىندە انىقتالادى. بۇل رەتتە وتباسىنىڭ تسيفرلىق كارتاسىنىڭ دەرەكتەرى دە قولدانىلادى.