بۇگىن، 18 قازان ازەربايجاننىڭ مەملەكەتتىك تاۋەلسىزدىگىن قالپىنا كەلتىرگەنىنە 35 جىل تولدى، دەپ حابارلايدى "ادىرنا".
Report اگەنتتىگىنىڭ حابارلاۋىنشا، 1991 جىلعى 18 قازاندا ازەربايجان جوعارعى كەڭەسى «ازەربايجان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق اكتىنى قابىلداعان.
بۇل قۇجات 1918 جىلعى 28 مامىردا ازەربايجان ۇلتتىق كەڭەسى قابىلداعان تاۋەلسىزدىك دەكلاراتسياسىنا جانە 1991 جىلعى 30 تامىزداعى «ازەربايجان رەسپۋبليكاسىنىڭ مەملەكەتتىك تاۋەلسىزدىگىن قالپىنا كەلتىرۋ تۋرالى» جوعارعى كەڭەس دەكلاراتسياسىنا نەگىزدەلگەن. سونداي-اق اكتىدە ازەربايجان رەسپۋبليكاسىنىڭ ازەربايجان دەموكراتيالىق رەسپۋبليكاسىنىڭ قۇقىقتىق مۇراگەرى ەكەنى بەكىتىلگەن.
وتكەن عاسىردىڭ باسىندا ازەربايجان حالقى تاۋەلسىز رەسپۋبليكا قۇردى. ال 1991 جىلى ازەربايجان دەموكراتيالىق رەسپۋبليكاسىنىڭ قۇقىقتىق مۇراگەرى رەتىندە ەلدىڭ تاۋەلسىزدىگى قايتا قالپىنا كەلتىرىلدى.
1992 جىلعى مامىردا ازەربايجاننىڭ مەملەكەتتىك ءانۇرانى بەكىتىلدى. ونىڭ مۋزىكاسىن ۇزەير گادجيبەكوۆ جازسا، ءسوزىنىڭ اۆتورى — احمەد دجاۆاد. كەيىن ەلدىڭ ءۇش ءتۇستى تۋى مەن جالىن جانە سەگىز بۇرىشتى جۇلدىز بەينەلەنگەن مەملەكەتتىك ەلتاڭباسى بەكىتىلدى.
2021 جىلعى 15 قازاندا ازەربايجان پارلامەنتىنىڭ پلەنارلىق وتىرىسىندا «تاۋەلسىزدىك كۇنى تۋرالى» جاڭا زاڭ قابىلداندى. سول كۇنى پرەزيدەنت يلحام اليەۆ قۇجاتقا قول قويدى.
زاڭعا سايكەس، 18 قازاندا اتاپ وتىلەتىن مەملەكەتتىك تاۋەلسىزدىك كۇنى تاۋەلسىزدىكتى قالپىنا كەلتىرۋ كۇنى بولىپ وزگەرتىلدى.
ازەربايجاندا جىل سايىن اتاپ وتىلەتىن بۇل مەرەكە رەسمي مەرەكەلىك كۇن بولعانىمەن، جۇمىس كۇنى بولىپ سانالادى.
