ازەربايجاندا 22 قىركۇيەكتە ازەربايجان، تۇركيا جانە وزبەكستان قارۋلى كۇشتەرى بولىمشەلەرىنىڭ قاتىسۋىمەن «بىرلىك كۇشى — 2026» اسكەري جاتتىعۋلارى باستالدى، دەپ حابارلايدى «ادىرنا» ءتىلشىسى.
اشىلۋ ءراسىمى قوجاۆەند اۋدانىنداعى «قىزىلقايا» وقۋ ورتالىعىندا ءوتتى. تۇركيانىڭ اسكەري قىزمەتكەرلەرى مەن اۆياتسيالىق تەحنيكاسى، سونداي-اق وزبەكستاننىڭ اسكەري كونتينگەنتى ازەربايجانعا الدىن الا جەتكىزىلگەن.
Anadolu اگەنتتىگىنىڭ مالىمەتىنشە، جاتتىعۋ ءۇش كەزەڭنەن تۇرادى. «قىزىلقايادان» بولەك، ءىس-شارالار ناحچىۆانداعى «قاراباعلار» وقۋ ورتالىعىندا جانە كاسپي تەڭىزىنىڭ ازەربايجانعا تيەسىلى بولىگىندەگى «ۇلكەن زيرە» پوليگونىندا وتپەك. وعان اۆياتسيا، اسكەري كەمەلەر، جاۋىنگەرلىك تەحنيكا مەن ۇشقىشسىز ۇشۋ اپپاراتتارى تارتىلادى دەپ جوسپارلانىپ وتىر.
ءۇش ەلدىڭ اسكەري قىزمەتكەرلەرى بىرلەسكەن وپەراتسيالار جۇرگىزۋ مەن بولىمشەلەر اراسىنداعى ءوزارا ءىس-قيمىلدى پىسىقتايدى. سونىمەن قاتار وقۋ-جاتتىعۋدىڭ ماقساتتارى قاتارىندا دايارلىق راسىمدەرىن ستاندارتتاۋ، تاجىريبە الماسۋ جانە جاۋىنگەرلىك مىندەتتەردى ورىنداۋدىڭ جاڭا تاسىلدەرىن مەڭگەرۋ بار. جاتتىعۋدىڭ قاشان اياقتالاتىنى ازىرگە جاريالانعان جوق.
ايتا كەتەيىك، وزبەكستاننىڭ ۇشجاقتى اسكەري جاتتىعۋعا قاتىسۋى انكارامەن قورعانىس سالاسىنداعى ىنتىماقتاستىقتىڭ كەڭەيۋى اياسىندا ءوتىپ جاتىر. ءساۋىر ايىندا وزبەكستان پرەزيدەنتى شاۆكات ميرزيوەۆكە تۇركيامەن اسكەري مامانداردى بىرلەسىپ دايارلاۋ، ۆەدومستۆوارالىق بايلانىستار جانە اسكەري-تەحنيكالىق ارىپتەستىك تۋرالى باياندالعان بولاتىن.
كەيىنىرەك تۇرىك تاراپى وزبەكستانعا اسكەري كەڭەسشىلەر توبىن جىبەرگەنىن مالىمدەدى. تۇركيالىق باق-تىڭ مالىمەتىنشە، كەڭەسشى توپتى گەنەرال-مايور باسقارادى. ونىڭ قىزمەتى تۇركيانىڭ ازەربايجان ارمياسىن جاڭعىرتۋ بارىسىندا جيناعان تاجىريبەسىن بولىسۋگە باعىتتالعان.
سونداي-اق تاشكەنت ناتو-عا مۇشە تۇركيادان اسكەري تەحنيكا ساتىپ الىپ جاتىر. بۇعان دەيىن Bayraktar TB2 ۇشقىشسىز ۇشۋ اپپاراتتارى، Ejder Yalçın بروندى كولىكتەرى جەتكىزىلگەنى، سونداي-اق ANKA دروندارىن ساتۋ ماسەلەسى قاراستىرىلىپ جاتقانى حابارلانعان. الايدا تەحنيكانىڭ ناقتى سانى مەن كەلىسىمشارتتاردىڭ قۇنى جاريا ەتىلمەدى.
