توقاەۆ سيرياعا گۋمانيتارلىق كومەك جىبەرۋدى تاپسىردى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
مەملەكەت باسشىسى توتەنشە جاعدايلار ءمينيسترى يۋري ءيليننىڭ ەسەبىن تىڭدادى. مينيستر پرەزيدەنتكە تۇركيانىڭ جويقىن جەر سىلكىنىسىنەن زارداپ شەككەن ايماقتارىندا قازاقستاندىق قۇتقارۋشىلاردىڭ جۇرگىزىپ جاتقان ىزدەستىرۋ-قۇتقارۋ جۇمىستارى تۋرالى باياندادى.
توتەنشە جاعدايلار مينيسترلىگىنىڭ قىزمەتكەرلەرى قيىن جاعدايلارعا قاراماستان، جەرگىلىكتى اتقارۋشى ورگاندارمەن تىعىز بايلانىسا وتىرىپ، جوعارى كاسىبيلىك تانىتىپ، ءوز مىندەتتەرىن ناتيجەلى اتقارىپ جاتىر. ازىرگە امان قالعان 4 ادام قۇتقارىلدى.
مەملەكەت باسشىسىنىڭ تاپسىرماسى بويىنشا قۇتقارۋشىلار مەن كينولوگتار توبى حابارسىز كەتكەن قازاقستان ازاماتتارىن ىزدەۋ ءۇشىن بۇگىن تاڭەرتەڭ حاتايعا جەتتى.
قاسىم-جومارت توقاەۆ قازاقستاندىق قۇتقارۋشىلاردىڭ جۇمىسىنا وڭ باعا بەرىپ، ولارعا ساتتىلىك تىلەدى.
سونىمەن قاتار پرەزيدەنت ۇكىمەتكە يسلام ىنتىماقتاستىق ۇيىمى ارقىلى سيرياعا گۋمانيتارلىق كومەك جىبەرۋدى تاپسىردى.
"ادىرنا" ۇلتتىق پورتالى
