الماتى قالاسىندا قازاقستانداعى العاشقى كرەماتوري رەسمي تۇردە ىسكە قوسىلدى، دەپ حابارلايدى "ادىرنا" ۇلتتىق پورتالى.
نىسان 30 ساۋىردەن باستاپ جۇمىس ىستەيدى. ول الاتاۋ اۋدانىندا، پاتولوگيالىق-اناتوميالىق بيۋرو جانىندا ورنالاسقان.
مامانداردىڭ ايتۋىنشا، كرەماتوريدىڭ ورنالاسۋ ورنى سانيتارلىق جانە ەكولوگيالىق تالاپتارعا ساي تاڭدالعان. عيمارات ماڭىندا تۇرعىن ۇيلەر جوق، ال قولدانىلاتىن تەحنولوگيالار قورشاعان ورتاعا زيان كەلتىرمەيدى. مۇندا چەح ءوندىرىسىنىڭ ەكى كامەرالى زاماناۋي جابدىعى ورناتىلعان: ءبىرىنشى كامەرادا ءمايىت ورتەنسە، ەكىنشىسىندە زياندى زاتتار تولىق جويىلادى.
كرەماتوري بىرنەشە بولىمنەن تۇرادى. ناقتىراق، ءمايىت قابىلداۋ زالى، ساقتاۋ بولمەسى، سەكتسيالىق زال جانە كرەماتسيا پەشتەرى ورنالاسقان ايماق. سونداي-اق جاقىندارىنا ارنالعان قوشتاسۋ جانە پروتسەستى باقىلاۋ بولمەلەرى قاراستىرىلعان.
ءمايىتتى ورتەۋ پروتسەسى شامامەن ەكى ساعاتقا سوزىلادى. پەشتەر 800–1100°C تەمپەراتۋرادا جۇمىس ىستەيدى. تولىق كرەماتسيادان كەيىن ورتا ەسەپپەن 2,5 كەلى كۇل قالادى. قولدانىستاعى ەرەجەلەرگە سايكەس، كرەماتسيا تەك كوزى تىرىسىندە جازباشا كەلىسىم بەرگەن ادامدارعا عانا جۇرگىزىلەدى. ەگەر ءولىم قىلمىستىق سيپاتتا بولسا، مۇنداي راسىمگە رۇقسات ەتىلمەيدى.
قىزمەتتىڭ بازالىق قۇنى – 240 مىڭ تەڭگە. الايدا ءمايىتتى تاسىمالداۋ، ساقتاۋ جانە دايىنداۋ قىزمەتتەرى بۇل باعاعا كىرمەيدى.
مامانداردىڭ ايتۋىنشا، قازاقستاندا كرەماتسيادان كەيىن كۇلدى كەز كەلگەن جەرگە شاشۋعا زاڭ بويىنشا تىيىم سالىنعان. ادەتتە كۇل ارنايى ساۋىتقا سالىنىپ، زيراتقا جەرلەنەدى. ال كولۋمباريلەر ازىرگە جوق، بىراق الماتى اكىمدىگى مۇنداي نىسانداردى سالۋ مۇمكىندىگىن قاراستىرىپ جاتىر.
ەسكە سالا كەتەيىك، كرەماتوري قۇرىلىسى بىرنەشە رەت كەيىنگە شەگەرىلگەن. جوبا 2021 جىلدان بەرى ءتۇرلى تەحنيكالىق جانە قارجىلىق سەبەپتەرگە بايلانىستى سوزىلىپ كەلگەن ەدى.
