سينوپتيكتەر 2026 جىلعا ارنالعان سۋ تاسقىنى جاعدايى بويىنشا الدىن الا بولجام ۇسىندى، دەپ حابارلايدى “ادىرنا” ۇلتتىق پورتالى.
قاۋىپ ايماعىنا قازاقستاننىڭ بەس ءوڭىرى ەندى.
«قازگيدرومەت» مالىمەتىنشە، بولجام سۋىق كەزەڭدە تۇسكەن جاۋىن-شاشىن كولەمىنە، توپىراقتىڭ قاتۋ تەرەڭدىگىنە جانە توپىراق بەتىندەگى مۇز قاباتىنىڭ بولۋىنا نەگىزدەلگەن. ماماندار بۇل بولجامنىڭ الدىن الا ەكەنىن، اۋا رايىنىڭ ناقتى جاعدايىنا بايلانىستى الداعى ۋاقىتتا ناقتىلاناتىنىن اتاپ ءوتتى.
سينوپتيكتەردىڭ دەرەگىنشە، باتىس پەن شىعىستىڭ بىرقاتار وڭىرلەرىندە كۇزگى ىلعالدانۋ كورسەتكىشى نورمادان جوعارى.
اسىرەسە تاۋلى ايماقتاردىڭ كەيبىر نۇكتەلەرىندە جاۋىن-شاشىن مولشەرى 150 مم-دەن اسىپ، جەردىڭ شامادان تىس ىلعالدانعانىن كورسەتكەن.
ال سولتۇستىك، ورتالىق جانە وڭتۇستىك وڭىرلەردە ىلعال دەڭگەيى نەگىزىنەن نورمادان تومەن نەمەسە ورتاشا، كەي جەرلەردە 25 مم-دەن دە از بولعان. ەل اۋماعىنىڭ باسىم بولىگىندە توپىراق قاتقان، تەك وڭتۇستىكتىڭ جەكەلەگەن ايماقتارىندا عانا ەرىگەن توپىراق ساقتالعان. توپىراقتىڭ ەڭ تەرەڭ قاتۋى سولتۇستىك-باتىس، سولتۇستىك-شىعىس جانە ورتالىق وڭىرلەردە تىركەلىپ، 125–148 سم-گە دەيىن جەتكەن.
سۋىق كەزەڭدە جينالعان اتموسفەرالىق جاۋىن-شاشىن مولشەرى شىعىس پەن سولتۇستىكتە نورمادان جوعارى بولسا، باتىس، وڭتۇستىك، وڭتۇستىك-شىعىس جانە ورتالىق وڭىرلەردە كەرىسىنشە تومەن بولعان. سونىمەن قاتار كونسۋلتاتيۆتىك سينوپتيكالىق بولجامعا سايكەس، 2026 جىلدىڭ اقپان–ناۋرىز ايلارى جىلى ءارى جاۋىن-شاشىنى ورتاشا دەڭگەيدە وتەدى دەپ كۇتىلەدى.
سۋ تاسقىنى بولۋى مۇمكىن وڭىرلەر قاتارىندا اقمولا، سولتۇستىك قازاقستان، قاراعاندى، شىعىس قازاقستان جانە اباي وبلىسى بار.
ورتاشا قاۋىپ دەڭگەيىندەگى وڭىرلەرگە قوستاناي، باتىس قازاقستان، اقتوبە، پاۆلودار، تۇركىستان، الماتى، ۇلىتاۋ جانە جەتىسۋ وبلىسى بار.
قاۋىپ دەڭگەيى تومەن وڭىرلەرگە اتىراۋ، ماڭعىستاۋ، قىزىلوردا، جامبىل وبلىسى ەنگەن.
