فوتو: اقوردا
قازاقستان پرەزيدەنتى قاسىم-جومارت توقاەۆ قازاقستاندىقتاردى ۇلتتىق مەرەكە – رەسپۋبليكا كۇنىمەن قۇتتىقتادى، دەپ حابارلايدى "ادىرنا".
مەملەكەت باسشىسىنىڭ قۇتتىقتاۋىندا ەلدىڭ تاۋەلسىزدىك جىلدارىنداعى جەتىستىكتەرى، كونستيتۋتسيالىق رەفورمالاردىڭ ماڭىزى جانە قازاقستاننىڭ الداعى دامۋ باعىتتارى اتاپ ءوتىلدى.
«بارشاڭىزدى ۇلتتىق مەرەكەمىز – رەسپۋبليكا كۇنىمەن قۇتتىقتايمىن!» – دەدى پرەزيدەنت.
مەملەكەت باسشىسى رەسپۋبليكا كۇنى قازاق مەملەكەتتىلىگىنىڭ قايتا جاڭعىرۋىن ايشىقتايتىن قاستەرلى مەرەكە ەكەنىن اتاپ ءوتتى.
«بۇل – مىڭجىلدىقتاردان تامىر تارتاتىن قازاق مەملەكەتتىلىگىنىڭ قايتا جاڭعىرۋىن ايشىقتايتىن قاستەرلى مەرەكە»، – دەلىنگەن قۇتتىقتاۋدا.
قاسىم-جومارت توقاەۆتىڭ ايتۋىنشا، قازاقستان ەگەمەندىك جىلدارىندا كوپتەگەن سىن-قاتەردى ەڭسەرىپ، ماڭىزدى بەلەستەردى باعىندىردى. بۇگىندە ەل ەكونوميكاسى قۋاتتى، قوعامى جاسامپاز، حالىقارالىق ارەناداعى بەدەلى جوعارى مەملەكەت رەتىندە دامىپ كەلەدى.
«قازاقستان تاۋەلسىزدىكتىڭ 35 جىلدىق مەجەسىنە ەكونوميكاسى قۋاتتى، قوعامى جاسامپاز، كۇللى الەم قاۋىمداستىعى قۇرمەتپەن قارايتىن، بەدەلى زور ءارى ىقپالدى ورتا دەرجاۆا، وركەنيەتتى مەملەكەت رەتىندە جەتىپ وتىر»، – دەپ اتاپ ءوتتى پرەزيدەنت.
مەملەكەت باسشىسى ەل دامۋىنىڭ جاڭا كەزەڭىندە مىقتى مەملەكەتتىك ينستيتۋتتاردى قالىپتاستىرۋ، ادام كاپيتالىن دامىتۋ جانە جاھاندىق باسەكەگە قابىلەتتىلىكتى ارتتىرۋ ماڭىزدى مىندەت ەكەنىن ايتتى.
«الدىمىزدا تۇرعان ماقسات – بارشاعا ايقىن. ءبىز مىقتى مەملەكەتتىك ينستيتۋتتارى مەن ساپالى ادام كاپيتالى بار، جاھاندىق باسەكەگە قابىلەتتى، وزىق، دامىعان، جاسامپاز، زايىرلى ەل بولۋىمىز كەرەك»، – دەدى ول.
پرەزيدەنت كونستيتۋتسيانىڭ زاڭدى كۇشىنە ەنۋىن ەل تاريحىنداعى ەرەكشە وقيعا رەتىندە باعالادى. ونىڭ سوزىنشە، اتا زاڭ مەملەكەتتىك باسقارۋ جۇيەسىن جاڭارتۋعا، سونداي-اق ساياسي، ەكونوميكالىق، مادەني جانە الەۋمەتتىك سالالاردا تۇبەگەيلى وزگەرىستەر جاساۋعا سەرپىن بەردى.
سونىمەن قاتار قاسىم-جومارت توقاەۆ قازاقستاندا وزىق تەحنولوگيالار مەن يننوۆاتسيالاردى دامىتۋ، جاساندى ينتەللەكت مۇمكىندىكتەرىن ەل يگىلىگىنە پايدالانۋ، زاماناۋي ءوندىرىس ورىندارىن اشۋ جانە ينفراقۇرىلىمدى جاڭعىرتۋ جۇمىستارى جالعاسىپ جاتقانىن جەتكىزدى. مەكتەپتەر، اۋرۋحانالار جانە باسقا دا الەۋمەتتىك نىساندار سالۋ دا باسىم باعىتتاردىڭ قاتارىندا.
مەملەكەت باسشىسى قوعامدا بىلىمگە ۇمتىلۋ، ادال ەڭبەك، جاۋاپكەرشىلىك پەن وتانشىلدىق قۇندىلىقتارىن نىعايتۋدىڭ ماڭىزىن اتاپ ءوتتى. سونداي-اق زاڭ مەن ءتارتىپ، تازالىق پەن قورشاعان ورتاعا قامقورلىق، بىرلىك پەن كەلىسىم قاعيداتتارىن دارىپتەۋ ارقىلى جاڭا قوعامدىق ەتيكا قالىپتاستىرۋ جۇمىستارى جۇرگىزىلىپ جاتقانىن ايتتى.
«وسىلايشا، ەگەمەندىگىمىزدىڭ تۇعىرىن كۇشەيتىپ، ادىلەتتى، قاۋىپسىز، وزىق ءارى تازا قازاقستاندى قۇرىپ جاتىرمىز»، – دەدى پرەزيدەنت.
قۇتتىقتاۋ سوڭىندا قاسىم-جومارت توقاەۆ ەلدىڭ بىرلىگى مەن رۋحىنىڭ بيىك بولۋىنا تىلەكتەستىك ءبىلدىردى.
«ەلىمىزدىڭ شاڭىراعى بيىك، ۇلتىمىزدىڭ رۋحى اسقاق بولسىن! كوك بايراعىمىز ءاردايىم بيىكتە جەلبىرەسىن! رەسپۋبليكا كۇنى قۇتتى بولسىن!» – دەپ تۇيىندەدى مەملەكەت باسشىسى.
