ماسكەۋ وبلىسىندا مايمىل شەشەگىن جۇقتىرۋدىڭ تاعى ءبىر دەرەگى تىركەلدى. بۇل تۋرالى Baza Telegram-ارناسى جازدى، دەپ حابارلايدى «ادىرنا» ءتىلشىسى.
باسىلىمنىڭ مالىمەتىنشە، دومودەدوۆو اۋرۋحاناسىنا دەنە قىزۋى كوتەرىلىپ، تەرىسىنە بورتپە شىققان جانە ليمفا تۇيىندەرى ۇلعايعان 38 جاستاعى ەر ادام جەتكىزىلگەن.
«ەر ادام دارىگەرلەرگە جاقىندا شەتەلدەن ورالعانىن جانە سودان كەيىن ءوزىن جايسىز سەزىنە باستاعانىن ايتقان»، – دەلىنگەن حابارلامادا.
سونداي-اق بۇل – اتالعان اۋرۋحانادا سوڭعى ءبىر ايدا تىركەلگەن مايمىل شەشەگىنىڭ ءۇشىنشى جاعدايى ەكەنى ناقتىلاندى. قازىرگى ۋاقىتتا ناۋقاس ينفەكتسيالىق بولىمدە ەم قابىلداپ جاتىر. دارىگەرلەر ونىڭ جاعدايىن قاناعاتتانارلىق دەپ باعالاۋدا.
بۇعان دەيىن ماسكەۋ وبلىسىندا مايمىل شەشەگىنە كۇدىكپەن اۋرۋحاناعا جاتقىزىلعان بەس ادامنىڭ ەشقايسىسىنان بۇل دياگنوز راستالماعانى بەلگىلى بولعان ەدى. بۇل تۋرالى رامەنسكوە اۋرۋحاناسىنىڭ وكىلدەرى ايتقان.
