فوتو جي كومەگىمەن جاسالعان
الماتىدا انتيبيوتيك ەكپەسىنەن كەيىن جاعدايى كۇرت ناشارلاپ، جەتى كۇننەن سوڭ قايتىس بولعان 14 جاستاعى ءجاسوسپىرىمنىڭ ولىمىنە قاتىستى قىلمىستىق ءىس قوزعالدى، دەپ حابارلايدى “ادىرنا”.
مارقۇمنىڭ اتا-اناسى مەديتسينالىق كومەكتىڭ قانشالىقتى دۇرىس كورسەتىلگەنىن انىقتاپ، ءىستىڭ ءادىل تەرگەلۋىن تالاپ ەتىپ وتىر.
“جەتىنشى ارنا” دەرەگىنشە، مارقۇم ماكسيم سەگىزىنشى سىنىپتا وقىعان. سپورتپەن شۇعىلدانىپ، سۋرەت سالۋعا قىزىققان. بولاشاقتا دارىگەر بولۋدى ارمانداعان. اناسىنىڭ ايتۋىنشا، ۇلى مەيىرىمدى ءارى جاناشىر بولعان.
اتا-اناسىنىڭ سوزىنشە، تامىز ايىندا ءجاسوسپىرىمنىڭ ليمفا تۇيىندەرى ۇلعايىپ، ولار بىرنەشە مەديتسينالىق مەكەمەگە جۇگىنگەن. الايدا تاعايىندالعان ەم ناتيجە بەرمەگەن.
21 قازاندا اتا-اناسى ماكسيمدى الماتىداعى №37 قالالىق ەمحاناعا اپارعان. ينفەكتسيونيست دارىگەر انتيبيوتيك تاعايىنداپ، پرەپاراتتى ەنگىزەر الدىندا اللەرگيالىق سىناما جاساۋ قاجەتتىگىن ەسكەرتكەن. الايدا اتا-اناسىنىڭ ايتۋىنشا، ەكپەدەن كەيىن بالانىڭ جاعدايى كۇرت ناشارلاعان.
ماريا كۋبارەۆانىڭ سوزىنشە، ۇلىنىڭ جۇرەگى اينىپ، دەنەسى شانشىپ، كەيىن ەسىنەن تانىپ قالعان. ەمحانا قىزمەتكەرلەرى وعان شۇعىل كومەك كورسەتكەنىمەن، جاعدايى جاقسارماعان.
كەيىن ءجاسوسپىرىم بالالارعا شۇعىل مەديتسينالىق كومەك كورسەتۋ ورتالىعىنا جەتكىزىلىپ، جاساندى تىنىس الۋ اپپاراتىنا قوسىلعان. دارىگەرلەر جەتى كۇن بويى ونىڭ ءومىرىن ساقتاپ قالۋعا تىرىسقانىمەن، بالا كوز جۇمدى.
قازىر مارقۇمنىڭ اناسى بالانىڭ اۋىر اللەرگيالىق رەاكتسياعا ۇشىراعان بولۋى مۇمكىن ەكەنىن ايتادى. وتباسى العاشقى مەديتسينالىق كومەكتىڭ ۋاقىتىلى كورسەتىلگەن-كورسەتىلمەگەنىن دە تەكسەرۋدى تالاپ ەتىپ وتىر.
الماتى قالاسىنىڭ دەنساۋلىق ساقتاۋ باسقارماسى وتباسىعا كوڭىل ايتىپ، تەكسەرۋ ناتيجەسى بويىنشا قوسىمشا اقپارات بەرىلەتىنىن حابارلادى.
الماتى قالالىق پد مالىمەتىنشە، اتالعان دەرەك بويىنشا قىلمىستىق ءىس قوزعالعان. قازىر ءتيىستى ساراپتامالار تاعايىندالىپ، تەرگەۋ امالدارى جۇرگىزىلىپ جاتىر.
