اقش-تا بەلگىلى روكفەللەر اۋلەتىنىڭ وكىلى، بۇرىنعى سەناتور IV دجون روكفەللەر (دجەي) دەۆيسون 89 جاسىندا ومىردەن ءوتتى، دەپ حابارلايدى "ادىرنا" ۇلتتىق پورتالى.
The Washington Post باسىلىمى ونىڭ 6 قاراشادا ۆاشينگتونداعى ۇيىندە قايتىس بولعانىن حابارلادى.
ساياساتكەر ءار جىلدارى اقش سەناتىنداعى ساۋدا، عىلىم جانە كولىك كوميتەتىن، ارداگەرلەر ءىسى جونىندەگى كوميتەتتى جانە بارلاۋ كوميتەتىن باسقارعان.
2008 جىلى ول يراكتاعى سوعىسقا دەيىنگى وقيعالاردى زەرتتەگەن سەناتتىڭ ەكى پارتيا وكىلدەرى قاتىسقان تەرگەۋىنە جەتەكشىلىك ەتتى. دجون روكفەللەر IV 1984 جىلى اقش سەناتىنا سايلانعان. ال 2013 جىلى 2014 جىلعى سايلاۋ قارساڭىندا قايتا سايلاۋعا تۇسپەيتىنىن ايتقان.
ساياساتكەر – Standard Oil مۇناي كومپانياسىن قۇرعان دجون روكفەللەردىڭ شوبەرەسى. ونىڭ ارعى اتاسى الەمدەگى العاشقى دوللارلىق ميللياردەرلەردىڭ ءبىرى بولعان.
Forbes جۋرنالىنىڭ 2016 جىلعى رەيتينگى بويىنشا، روكفەللەرلەر وتباسى اقش-تىڭ ەڭ باي اۋلەتتەرى اراسىندا 23-ورىنعا ورنالاسقان. سول كەزدە وتباسىنىڭ جيىنتىق بايلىعى 11 ميلليارد دوللارعا باعالانعان. ال رەيتينگتە ءبىرىنشى ورىن العان Walmart ساۋدا جەلىسىنىڭ يەسى ۋولتوندار وتباسىنىڭ بايلىعى شامامەن 130 ميلليارد دوللار بولعان.
